martes 11/8/20
LLUIS PORTAL

Un Cronista de la Villa

Un Cronista de la Villa

Acaba d’asoleyase la obra de Miguel González Pereda, “Ramón Rivero Solares. Un cronista de la Villa”. Trátase d’una biografía y obra inédita del que firmaba, mui modestamente, como cronista -oficiosu, nunca hubo cronísta oficial- de Maliayo. Una obra peresperada, y pervalorada, poles persones interesaes nes coses del pueblu, que sal 30 años dempués de fináu Ramón. Circunstancies enforma enguedeyaes ficieron que se sacaren, involuntariamente, los sos papeles, llibros, semeyos y dalguna grabación fílmica, de la Villa. Que se vendieran al pesu -con nocturnidá y alevosía- los sos llibros; que s’ufiertaran al meyor postor les obres poétiques inédites..., en fin, una catástrofe difícil d’iguar.

González Pereda fizo, col sofitu del sobrín de Ramón, José Manuel Marugán Rivero, con Senén Rivero, Etelvino González y Elvira Palacios, un trabayu de reconstrucción -inevitablemente parcial- de la obra de Ramón. Escritor en castellán y en bable, nesta última llingua escribió magníficos sonetos sobre xente maliaya de la dómina: ‘Cosmín’, ‘Toralín’, Emilio Díaz, Falo ‘Zapicón’, Felipe ‘Cacaío’, Joselín Talbo; escribió teatru en bable estrenáu con fines solidarios -que nun se caltienen- como ‘Con perres d’otru quién ye tacañu’; y les dances de ‘San Xuan d’Amandi’ y el ‘Cu-cu’ qu’escribió con música del maestru Juan José G. Renedo, nos años 50, xuntu cola ‘Danza del Portal’.

Rivero estudia con rigurosidá la historia de Villaviciosa dende’l sieglu XVII hasta l’actualidá: la fundación del Monesteriu Franciscanu, la guerra napoleónica, los personaxes llocales, les costumes, la Semana Santa d’antes de la guerra civil, etc. Ye miembru del Institutu d’Estudios Asturianos y publica na so revista, así como n’otros periódicos de la Villa: ‘Valdediós’, ‘Gaceta de Maliayo’... Igua con mui bona lletra pieces poétiques mui interesantes.
Esti llibru ye publicáu por Cubera con un estupendu diseñu de Ángel Valle.

Un Cronista de la Villa
Comentarios