La nuesa sociedá, especialmente les xeneraciones más nueves, son víctimes del escaezu. Son persones ñacíes yá nun mundiu nel que tal paez que nun esiste la fame, nin la enfermedá, nin la miseria, nin la guerra. Tamién foran educaes nuna seguridá cuásique absoluta y ampares nunes normes tan protectores que tal paez qu’el riesgu nun esiste, cuando la vida, si por dalgo se define ye pol riesgu.
A mio madre, que m’educara d’una forma escelente y que me quixo como ye lo normal que les madres quieran a los sos fios, y que me sigue queriendo porque, afortundamente, vive, taría güei na cárcele. Cayía d’una muria, diba pa casa, mio madre llimpiábame la fería, un poco mercromina ya una venda y… a correr. Y munches coses más de les que tóos los que tenemos unos años sabemos.
La capacidá pa escaecer les coses en mui pocu tiempu ye sensacional. Naide paez remembrar que la droga llevó per delantre a una parte importante d’una xeneración, la que va de mediaos los ochenta y mediaos los noventa. Fora antiayeri. Pero la heroína vuelve, y vuelve porque yá nun mos recordamos de lo que fuera aquello, cola cantidá d’amigos, primos ya hermanos que perdimos nes manes de la muerte o de la demencia, amás de llevar a la ruina a families y allegaos.
Perdiéramos el miéu al sida porque yá nun remembramos lo que pasara nes dos últimes décades del XX. Y resulta que vuelve, xunta otres munches enfermedaes de tresmisión sexual que pensábamos erradicaes. Yá nun sabemos de los neños abrasaos pola viruela, los malformaos pola polio, los que sufrieran pol sarampión… Ya, entóncenes, dalgunos pueden tar contra los condones o contra les vacunes, nuna inorancia criminal antroxada de lliberalidá.
Y tamién paez que mos escaeciéramos de los totalitarismos que llevaron al mundiu a miyones de muertos hai namás qu’ochenta años. Varies xeneraciones, la primera d’elles ye la mía, nun coñocieron la guerra y vivieron la Europa de la paz, por más que portugueses ya españoles lo viviéramos d’una forma peculiar, embaxo una dictadura.
Esi escaezu de qu’Europa, la idega d’Europa, la Unión Europea, significara la finalización de sieclos de guerres, unes guerres europées que, na realidá, son, dende Carlomagno, guerres civiles, ta llevándomos al suicidiu collectivu a llargu plazu y yá mos lleva a la irrellevancia política a curtiu. La Unión Europea ye l’únicu horizonte que tenemos si nun queremos volver al totalitarismu, a la guerra y al ostracismu nel contestu mundial.
Pero podemos volver a la heroína, a la viruela, al sida, al fascismu y a la guerra ente naciones. Ye verdá que, dicen dalgunos, creáronmos con llibre albedeíu y podemos tomar eses decisiones. Cualisquiera tien plena llibertá pa tirase dende lo alto d’un cantil porque nun sepia lo evidente: que doscientos metros son munchos metros. Bono, nun sedría’l primeru que muerre por facer un selfie delantre d’una llengua de llava d’un volcanu.
