DAVID M. RIVAS

Un día d'abril

Escribre Rivas sobre la oficialidá de la llingua

david-m-rivas-elfielato-digital.jpg

Oficialidá de la llingua

 

Yera’l 21, con tiempu primavera ya humidá. Uviéu, la capital d’un reinu vieyu, ún de los más vieyos d’Europa, viera marchar a decenes de miles de persones con un únicu obxetivu, un ermunu esmolecimientu, “de lo xusto y llegal el cumplimientu”. Nun falo de la manifestación en pro del ferrocarril de primeros del sieclu XX, de la que, con estes pallabres, falaba Teodoro Cuesta. Non. Falo de la marcha pola oficialidá de la llingua asturiana del pasáu sábadu. L’Asturies plural y democrática, la que nun quier imponer nada pero que yá ta farta de que-y impongan, la que nun quier privilexos pero tampoco ser minorizada, esa Asturies que, amás, ye moza, culta y cosmopolita, saliera a la cai.

Esa Asturies nun pide otra cosa que ser igual que Galicia, que Valencia, que Cataluña, que Baleares, que Navarra, qu’el País Vascu; qu’apliquen la constitución -esa norma tan democrática de la que tanto falen- y que diz, lliteralmente, que na comunidá onde haiga una llingua distinta del castellán, esa llingua debe ser oficial.

Dicen agora dalgunos qu’esto ye una maniobra del PSOE. Inclusive un periódicu de Madrid falaba nel so editorial de que lo del sábadu yera una “diada montada pol PSOE”. Mentira. Ye verdá qu’el PSOE paez tar cambiando la so postura sobro la llingua, ya yo creyo que con bon criteriu, pero la revindicación ye de vieyo. Llamar a la cosa “diada” ye significativo: hai quien quier contaminar la xusta revindicación llingüística asturiana col problema catalán. Tiremos d’hemeroteca y veremos como hai años falaben d’ello como de “borroka” y de los asturianistes como “asturchales”. ¡Caro! D’aquella lo criminalizao yera lo vasco.

Tóo ye muncho más cenciello. Que dexen al asturiano esporpollar como a los demás idiomes. La oficialidá nun garantiza la supervivencia pero permite la posibilidá. L’irlandés ye oficial nun país tan nacionalista como Irlanda y nun para d’amoriar ya igual desapaez. L’hebreo ye oficial nun país tan nacionalista como Israel y progresa, pasando d’un dos por cientu falantes al 75 en cuarenta años. L’Asturies democrática y plural pidiera esti sábadu n’Uviéu namás qu’una cosa: que mos dexen vivir nes dos llingües qu’emplegamos. Pero con igualdá.

Más en Opinion