DAVID M. RIVAS

Equí toi, con vustedes

L'asturiano ye una llingua amable, que nun ñaciera contra naide.

Ye pa mín una satisfaición collaborar con “El Fielato” y facelo, amás, como’l columnista que va escribir en llingua asturiana. Voi escribir nel asturiano normativu, esi que munches vegaes llama l’atención a la xente que fala mui bien la nuesa llingua pero que nun ta avezada a velo escrito.

david m rivasTamién, caro, emplego la fala de llugares pequeños, mui de casa, de la mía ente otres. Pienso que tenemos la obligación de salvar esta llingua que mos dexaron los nuesos antepasaos, esos homes y muyeres que nunca mos diben perdonar que los tratáramos de palurdos y babayos por falar como falaben. L’asturiano ye una llingua amable, que nun ñaciera contra naide. Ye tan amable que ye la única d’España que nun ye oficial. Los asturianos pagamos impuestos pa protexer el gallego, el vasco ya’l catalán, pero nun podemos defender l’asturiano. Amigos llectores, vecinos d’esti oriente, ¿paezvos eso razonable? Dende estes llínies qu’esti periódicu exemplar me dan voi tratar de demostrar qu’el nuesu idioma val pa la folixa y pa la relixón, pero también pa la física, pa la economía, pa la psicoloxía, pa la vida, que ye lo importante. Tamién-ys digo que nun soi mui correctu y que me meto n’asuntos que veo como importantes anque nun gusten a los que manden. Nun pertenezo a denguna familia política d’esta Asturies tan maltratada. Van vustedes discrepar de lo que digo en munches ocasiones y, quiero creyer, que notres munches taremos d’alcuerdo. Pero tean por de xuro que namái que me mueve una cosa: trabayar pol mio país, por Asturies, y, nesti periódicu, polos conceyos que van del Romeru al Tina y del Cantábricu a los Picos d’Europa. Dende la mio casa, n’Argañosu, una aldega de Villaviciosa, un saludu y la confianza en que mos vamos tratar munchu tiempu.

Más en Opinion