DAVID M. RIVAS

Salvar los raigaños

Que les families decidan l'orde los apellíos ye bona cosa

david-m-rivas-elfielato-digital.jpg

El gobiernu español, por fin, decide que los apellíos d’un neñu nun los determina l’estáu sinón la familia. La llei franquista que rexía ata güei (hai cientos de lleis franquistes, inspiraes nel nazismu dalgunes, que siguin vixentes) muerre, cosa que debería tar resuelto hai décades. La predominancia del padre pa nominar a los fíos ye dalgo absurdo que namái ye desplicable ideolóxicamente. Ye qu’ata lo diz el chiste: “mio madre ye mio madre, mio padre dizlo un xuez”. El padre ye’l que figura nel bautismu y nel xulgáu. Y puntu. Por eso los xudíos, pueblu sabiu, namás que consideren xudíu al fíu d’una xudía. Y los portugueses, campesinos y navegantes, ponen l’apellíu de la madre delantre, anque, ye verdá, suelen emplegar el del padre. Los asturianos fuéramos obligaos pola llei española de los xacobinos borbónicos. Equí l’apellíu nun furrulaba, sinón el nome la casería. Nun yeras Pepe Martino sinón Pepe Lluciano d’Elisa o Pin de Casa Llames. Nesa borbonada afrancesada perdiéramos nomes, apellíos y ñomatos. De nun aparar esta llaceria, en pocos años tolos asturianos van ser Fernández Fernández. Y nun ye clasismu, non. Ye qu’esi Fernández yera hai cien años Fernandi de Bulnes, Fernandi d’Unquera, Fernandi de Coceña, Fernandi de Torazu, Fernandi de Con, Fernandi d’Argolibiu, Fernandi de Quintes… Yeran les dinastíes de los Fernán de munchos sitios.

Que les families decidan l’orde los apellíos ye bona cosa. Ye, en primer llugar, poner a la muyer a l’altura’l paisanu: ella nun ye menos qu’elli. Pero también val pa salvar los apellíos. Igual dalgunos sobrinos de mio puen algamar llamase como siempres mos llamamos. Pué ser una bona ocasión pa recuperar apellíos que van perdese. Sin dir más lloñe, el mio primu más mozu ye coñocíu pol apellíu de mio güela. Si quier, que va querer, podrá recuperar la llínia materna y que los sos fíos lleven el que ye’l mio tercer apellíu, Pardo de Quintueles o inclusive otru más pallá, McLaren, que vieno con un escocés cuando la francesada y casó en Villaviciosa. Nun ye custión de buscar lo más prestoso, como que nun ye meyor llamase Kevin que Belarmino o llamase Olaya que Shakira, non. Ye custión, cenciellamente, que mos dexen ser lo que somos. Nun pedimos más. Pero si ata neso mos ponen torgues…

Más en Opinion