viernes 24/9/21

Esperando les migayes

Tamos yá cerca de pesllar la negociación de los nueos fondos que, dende la Unión Europea, van llegar al reinu d’España y que, dempués, van ser distribuyíos nes comunidaes autónomes. Paez ser que l’executivu de Pedro Sánchez diba aprebar nesti mes d’avientu una ordenación y axilización, seguramente al traviés d’un real decretu, de les aídes europées. La verdá ye que tamos esperando por ello.

Les comunidaes autónomes, delantre d’esta indecisión, de xuru que porque’l gobiernu andaba buscando alcordaes pa sacar allantre los presupuestos xenerales del estáu, decidieron actuar. Dalgunes tomaran la delantera y plantegaran proyeutos y programes con cifres y periodificación. Asina, por exemplu, los gobiernos de les tres comunidaes que comparten con Asturies la exa atlántica costera (Galicia, Cantabria y País Vascu) punxeran negro sobro blanco les cifres. El 8 de payares, va yá más d’un mes, falaron claro: 24.173 miyones. La tercera comunidá de la exa, la interior Castiella y Llión, nun afinara tanto, pero plantegara neses mesmes feches 71 iniciatives estratéxiques.

Diz el gobiernu de Barbón que va priorizar los proyectos verdes, la salú y la cohesión territorial. Eso nun lo creye’l llavianiegu nin cargáu de lo que tome.

¿Que fixera’l gobiernu d’Astturies? Pal conseyeru Cofiño, falamos del 26 de payares, cuásique tres selmanes dempués, yera “mui prematuro falar de proyectos concretos”. Esi día l’executivu de Barbón presentara la idega d’un “mapa d’estratexes”, al tiempu qu’anunciaba la constitución d’un comité asesor de fondos europeos pa llevar les coses a bon términu. Nun soi gran xugador, soi de mus, pero apostaría 5 a 1 a que de diez miembros del comité acierto col nome d’ochu. Ye más, apostaría 100 a 1 a que nun tará dengún académicu por mui reconocíu que seya que nun tea carné o ñacíu nuna casa de carné. Dicía’l conseyeru qu’había quince díes pa que los espertos falaren. Tamos a mediaos d’avientu, tiempu cumplíu, y a veles venir. El mapa d’estratexes, paez ser, contempla mediu centenar de planes y de programes que impliquen a toles conseyeríes, eso sí, ensín denguna especificación financiera. Volveremos a les andaes, al modelu “somáticu”, que merez una bona tesis sobro lo que nunca debe facese en política económica. La mesma Unión Europea lleva avisando a los gobiernos asturianos de que mala política ye pidir aídes y fondos pa tóo, que o se apuesta por grandes centros comerciales o por comerciu de proximidá, pero que poles dos coses nun ye comprensible en Bruxelles. Ye qu’el mesmu Diego Canga, conseyeru de la Comisión Europea, dixera qu’Asturies gastara munchos miyones pensando namás qu’en mantener alcaldes. Como dícía enantes: “Asturies o la vía somática al cagayal”. Sedría bon títulu pa un llibru. Y dicía tamién Canga qu’Asturies conformárase con arrecibir lo que bonamente-y vinía por ser una rexón d’un estáu de la Unión Europea. La traducción ye fácile: el PSOE llimitárase a obedecer al gobiernu central y a repartir ente les sos families los fondos europeos que, nun yeran d’un país sinón d’un partíu, non d’una ciudadanía sinón d’un réxime.

Por eso’l gobiernu asturianu nun sabe qué programes presentar y prefier esperar a lo que diga Madrid, a que Pedro Sánchez y Pablo Iglesias comercien en favor d’otres comunidaes y dempués... lo que caiga y a mandar.

Diz el gobiernu de Barbón que va priorizar los proyectos verdes, la salú y la cohesión territorial. Eso nun lo creye’l llavianiegu nin cargáu de lo que tome. El PSOE y tol “stablishment” d’Uviéu, de les cuenques y de la facultá d’economía hai años qu’apostaron por una Asturies urbana, periurbana y suburbana, dando por muertes a lo que llamen “ales”, l’oriente y l’occidente. Nun hai llugar na so “provincia” pa la diversidá y... ¡ai, amiguinos!, resulta qu’eso choca cola Unión Europea y la so política tarrentorial. Ye que, precisamente, son les “ales” los espacios prioritarios nesa política europea. Pero eso los del SOMA, l’únicu sindicatu’l mundiu ensín obreros ya ensín actividá productiva que condiciona gobiernos, nun lo saben. Por eso’l gobiernu asturianu nun sabe qué programes presentar y prefier esperar a lo que diga Madrid, a que Pedro Sánchez y Pablo Iglesias comercien en favor d’otres comunidaes y dempués... lo que caiga y a mandar.

El gobiernu central tien el 30 d’abril como fecha llímite pa presentar los proyectos d’inversión y reformes estructurales. Falamos de 140.000 miyones d’euros. El gobiernu d’Asturies diz tar “engrasando” la so propuesta pa fin d’añu. Esperemos que los reis magos se porten bien, anque yá nun haiga carbón pa Baltasar, por muncho que dalgunos decidan como si lo sacáramos a palaes.

Esperando les migayes
Comentarios