Opinión

¿Por qué toles tochaes pasen nel oriente?

Tochada primera. Unos turistes, madrilanos evidentemente, que tan nun hotel rural, "hotel rural", apuntemos, protesten porque los pitos canten cuando alborez y despiértenlos. Notru llugar otros turistes, madrilanos tamién, protesten porque pela mañana hai ruíu de tractores y de motosierres. Otros, nun vamos decir de ónde porque paqué, protesten porque fiede a cuchu o porque les vaques caguen xunta'l so coche. Son coses que conocemos d'estos menses pasaos nos conceyos de Los Picos d'Europa.

Tochada segunda. Unos turistes, "ellos" otra vuelta, protesten porque los bufones de Pría tan "apagaos". Llegaran con marea baxa y nun pudieran ver aquello tan guapo de les promociones turístiques. Y dempués subieron a los llagos de Cuadonga, con mui mala estrada, "nun cabíen dos coches", pa llegar a un llugar con "fríu árticu". Ye que lo de que yera una carretera de montaña y que facía fríu nun taba nel folletu turísticu.

Tochada tercera. "Ellos" protesten porque ye tóo mui caro y que nos chigres ponen mala cara porque piden un menú pa cinco persones, augua'l grifu y cubiertos pa tóos. Lluéu van a la playa y resulta que ta la mar alta y reclamen porque naide los avisó de que l'océanu furrula d'una manera diferente a la piscina de Carabasaña de Lavamartín. Y, pa encima, enciérrase a llover, una imax que nun apaez nes campañes turístiques qu'el gobiernu y los ayuntamientos principescos nunca dan. En viendo les campañes turístiques d'Asturies, nesti país nun llueve nunca.

Pero hai una cosa llamativa. Toes estes tochaes pasen nos conceyos del oriente. Dalguna se da en Xixón, dalguna en Valdés, dalguna en Cuideiru... Denguna en Cangas del Narcea, nin en Santalla d'Ozcos, nin en L.lena, nin n'Ayer... ¿Será casualidá? ¿Tién l'oriente asturianu dalgún xeitu ancestral que lleve a que tolos fatos acaben llegando?

Yo, que soi de Villaviciosa y casáu en Cangues d'Onís con muyer de raigambre n'Amieva, creyo que non. Nun ye dalgo ancestral, nun ye dalgo conxénito, sinón dalgo político. L'oriente asturianu ta rexíu por inorantes, que ye muncho decir nuna Asturies que ye mayoritariamente dirixida por inorantes. La oferta turística asturiana ye llamentable y ye particularmente llamentable la del oriente. Los turistes, y especialmente "ellos", son clientes, non "marqueses", y son ellos los que tienen qu'entender como funciona un país y non los paisanos los que tienen qu'adaptase y obedecer a los señoritingos.

Tenemos dalguna forma de resistir, tamién ye verdá. Yo, por exemplu, hai años que nun gasto un perru en Piloña. Paso per esi conceyu dos o tres vegaes al mes y nun echo nin gasolina. Y duelme. Pero decidieron facese sevillanos y, como Sevilla tien tanta xente como cuásique toa Asturies, supongo que podrá Piloña vivir de les rentes de los sevillanos. Yá sé qu'esto ye una "boutade" que nun va a denguna parte, pero... Hai quien critica'l Mundial de Catar, pero yo quédome más cerca, a cuarenta kilómetros de mio casa.

¿Ónde se fixera una corría toros esti branu? N'Onís. ¿Ónde montaron la campaña sobro que lo de Cuadonga yera una escaramuza ensín importancia y qu'aquello nun fuera nada na historia? En Cangues d'Onís. ¿Qué conceyu plantegó que poner "Les Arriondes" despistaba a los turistes que buscaben "Arriondas"? Parres. ¿Qué conceyu decide que "Fabar" ye mal nome pa un túnele porque tol mundiu, dende Corea a Nebraska, lu conoz como "Ordovícicu"? Ribeseya.

Toles tochaes pasen nel oriente asturianu porque lo tenemos merecío.