El solsticiu ye fiesta importante de les relixones antigües
Otru añu que tamos equí, un añu más pa los más mozos, un añu menos pa los más vieyos. Yo soi de lo que tamos en metada’l camín, pero yá con más vida a popa qu’a proa. Un solsticiu más d’iviernu, un nadal, una pascua, un añu qu’entra…
El solsticiu ye fiesta importante de les relixones antigües. Los vieyos pobladores de les Asturies, los nuesos antepasaos, creyíen qu’el mundiu yera planu y que tinía dos cares: una yera na que vivíen, la que mira parriba, ya otra la de los muertos, la que mira pabaxo. Y nos solsticios, como nos equinoccios, esos dos mundios comunicábense. Los romanos, de cultura más histórica y pragmática, entendíen que nel solsticiu, col sol na so mínima o máxima espresión, podía vese el pasau ya’l futuru. El so dios Ianus, el bifronte, yera un vieyu que miraba pal és y pal oés a un tiempu, recordando y anticipando. El cristianismu garrara esa idega: Ianus diba ser Xuan. El Xuan del iviernu, l’evanxelista, revela, escribe l’apocalipsis. El Xuan del branu, el bautista, salva, proclama la redención del mesíes. El Xuan del iviernu ye una vela nun árbole, callandina y llariega, El Xuan del branu quema, prende l’arbole delantre tol pueblu.
Ya ye pascua, porque ye un pasu, heredá de los xudíos. Ye la encarnación d’un dios nel vientre d’una rapacina de pueblu ensín más títulu que la so virtú y la so bondá. Na vida d’una persona danse munchos pasos, pero dengún tien la importancia qu’el del nacimientu ya’l de la muerte. Cuando nacemos entamamos el camín, más llargu o más curtiu, haza la muerte. La pascua, el pasu, los pasos sucesivos… Ya’l misteriu.
Vivimos tiempos secularizaos. La relixón yá nun rixe, afortunadamente, la vida social. Hai tiempu que mos llibráramos de peslleres d’alcanfor y d’inciensu. La selmana santa ye folclore andaluz, más asemeyao a la feria d’abril qu’a la pasión d’un cristo. San Xuan ye una folixa onde les ciudaes y villes compiten pola foguera más grande, escontra la que la xente bebe y bailla como fairía nuna fiesta organizada por una discoteca. Pero, pesie a tóo, el nadal sobrovive.
Va ún peles caleyes de les aldegues y peles cais de les villes y ve árboles con lluces, corredores y balcones onde relluma la estrella blanca, el cometa que mos vien dende l’oriente. Y poques son les cases nes que nun haiga un arbolín coles boles que representen, nuna última instancia, el frutu’l parayisu, la mazana primordial, el frutu’l conocimientu que, col evanxeliu, mos reconcilia col gran arquitectu, col creador.
Ye qu’l nadal ye la fiesta cristiana menos ideolóxica qu’esiste. Ye imposible que dalguién vea mal cellebrar la llegada d’un neñu, que vien al mundiu ente campesinos y pastores, a la callor d’animales nuna cuadra, naciendo contra l’ode establecíu. Y, amás, sabemos cuála va ser la so historia, la d’un neñu dende’l peselbre ata l’home camín del patíbulu, un neñu que naciera a escondíes del rei y qu’acabara na cruz del emperador.
Pudiere haber xente que nun piense esto, de xuru que por mui bones razones personales: un gran dolor, una gran decepción, un mui mal recuerdu… Pero festexar el nacimientu d’un neñu, seya rei o non, seya dios o non, ye dalgo connatural al ser humanu, que somos sangre y carne, pero tamién pensamientu y voluntá. Asina veo yo estes fiestes. Nun soi creyente, nun teo relixón, pero nestos díes finales d’avientu veome perafitau na mio visión del mundiu que ye fonderamente cristiana y que, quiero pensar, tien muncho de bondá. De la “bona voluntá” de los homes y muyeres que visitaron a aquella María que pariere nuna cuadra.
