Fotos en b/n

Yá nun esiste la oralidá. Yá nun se cuenten les histories de siempre a la lluz del llar, ente otres coses porque casi nun queden llares. Antiguamente había casinos -de Casu- que veníen a Colunga o Les Mariñes de Villaviciosa y traíen romances que recitaben al pie de la lletra. Pero naide s’acuerda yá de les estrofes nin de los casinos.

Cruzaben del otru llau del cordal vieyos violineros de la meseta que tocaben y cantaben sin partitura, munchos d’ellos ciegos, munchos d’ellos dexaron violineros espardíos per dayures. Yá naide sabe qué cantaben porque, en realidá, nun nos interesa demasiao. Baxaben los del occidente hasta Lleón en busca de trabayu, volvín con cantares que se dicín a dambos llaos de los montes, con platos que se cocinaben, xuegos que se xugaben, amores que s’olvidaben o non...

Carlos de la Concha    

En munchos pueblos nun queden habitantes que reproduzcan esa oralidá. Nin quién sepa onde vivía fulanu o menganu, nin ónde queda’l rexistru del agua siquieramente; quedaron vacíos como un ríu de maltiempu.

Cuantayá que morrieren los aldeanos que recitaben los versos de Carlos de la Concha sobre la sidra, na publicación ‘Los sueños del probe Lin’, que diben pel mundu enteru gracies a les caxes de tablilla d’El Gaiteru. Poemes como ‘Anxelinos de más, fiyos de menos’, a los que-y daben vida Aníbal Jesús, el fíu del Alcalde cabranés Jesús Arango. O los versos d’Enrique Perez Álvarez, muertu lloñe de la tierra, siempre con un versu na boca y una señaldá que nun-y cabía en pechu...    

Pronto saldrá una colección de cien cuentos recopilaos por mi, de leyendes, mitos y costumbres de Villaviciosa y Cabranes, atropaos durante más de trenta años. El 90% d’ellos pertenecen a persones que yá críen malves, y sólo queda vivu dalgún vieyu que tien más de setenta años. Pero considero necesario publicalo, anquen nun sea más que por un actu de xusticia hacia ellos.

Un mundu que muerre

Por una parte ye inevitable. Por otra ye una llaceria. Hai un filu d’autenticidá que nos xunce a un pasáu que desaparez inevitablemente. Muerre un mundu que llegó malpenes hasta nós, y que forma parte de la nuestra vida queramos o non.

Hai dos coses que xuncen les nuestres aldees a la civilización: los chigres y les iglesies. Cuando una aldea pierde les dos coses, queda como un pollu ensin cabeza, dando brincos espasmódicos. Ya nun hai razón pa que se xunten los vecinos el dìa del santu pa celebrar que tan vivos, ellos mismos, y los pueblos en que permanez trancada la casa.

Queden, eso sí, los móviles, les tabletes, los ordenadores… pero tamién queda un mundu n’interrogante que nos entruga como será’l ser humanu. Del testimoniu verbaal pasamos a la cuestión cibernética. Quiciabes sea un saltu demasiao grande pa salvar l’aldea: ¿N’ónde queda l’hombre?

Una caxa zapatos

Guardo nuna caxa zapatos llena de fotos antigües en blancu y negru. Son la mayoría d’un requexu que se llama Villar y d’una familia que ye/yera la mía. Fotos de tíos emigrantes a Cuba, de carreteros que carretaben estru, de la xata la rifa, del ramu del Rosariu, del rapaz que marchó a la quinta cuando la guerra, del mio bisabuelu Mel de María, de la boda de los mios güelos Remedios y Mel, del Reo, de los mios padres...

Son fotos toes en b/n que nos une y nos separa. Paecen coses más antigües de les qu’en realidá son pola falta de color, pero la cuestión ye que nos paecen mui vieyes. Yo yá debo ser vieyu porque na mio caxa de zapatos guardo fotos míes en b/n.