Gancéu y los celtas
L’arqueólogu inglés, profesor eméritu d’Oxford Barrington Cunliffe, autor de la interesante obra ‘Celtas desde el Oeste’ (2010), revoluciona considerablemente -xunto con otros autores de la misma tendencia- el mundu de los celtas, colacando l’entamu de los mismos nel poniente de la Iberia prerromana, parte de Francia, n’Inglaterra y parte de la isla d’Irlanda.
A diferencia de les teoríes clásiques que situaben el nacimientu de lo céltico nel centru d’Europa y na rexón de Hallstatt (parte de Francia, Alemania y Austria) con sos grandes vasos campaniformes d’usu funerariu, d’onde vendrín, nel siglu V a.C, emburriaos por tribus ‘alemanes’ a la península ibérica, el restu d’Europa y Asia menor.
Una idea revolucionaria
Los nuevos estudios que revolucionen esta idea sitúen nos finisterres atlánticos d’Europa’l primer esporpolle d’esta peculiar etnia. Y lo más llamativo, munchu antes de los cinco siglos en que se presumía l’aparición de los celtas, estos autores corren les cifres hasta’l III mileniu a.C, que ye cuando’l profesor Cunliffe afita tal presencia.
De confirmase estes teoríes, suponen una revolución del saber y la Historia. En parte susténtense nel resultáu de les escavaciones arqueolóxiques feches en époques relativamente recientes, nel estudiu de la llingüistica y la presencia de toponimia céltica nel continente. En sitios como n’Asturies, que nun tien una llingua céltica pero si hai cantidá de nombres célticos que subsisten na actualidá na península, xunto con Galicia, Portugal y Castilla, sería un buen sitiu pa la investigación.
Cabe indicar, sin que nadie se sienta molestu, que los grandes autores qu’investiguen la toponimia asturiana, nun tienen un gran conocimiento de les llingües céltiques, polo que apaecen muchos topónimos como ‘prerromanos’ cuando nun tienen una cercanía colo romano. Quiciás por esa razón Asturies nun figura nes manches de toponimia céltica pesie a que tien abonda nomenclatura d’esti orden.
‘Ganzetum’ y los lunggones
Cuando estudiamos la toponimia de Gancéu pal llibru ‘Ganzetum’ (Asociación La Peñueca, 2024), rastrexamos el nombre del pueblu hasta llegar al vieyu gaélicu irlandés *ganskio, na forma más antigua del gaélico qu’inda existe como idioma faláu na Europa occidental.
Pero ye evidente que si s’atribúi a los lunggones arganticenos la única presencia nos valles del centro-oriente d’Asturies, según los espertos de los años 30 Pedro Bosh-Gimpera y Martínez Santa-Olaya, a los que faen proceder de Hallstatt, hacia’l 600 a.C, non igua cola teoría irlandesa del topónimu.
La cosa complicase más cola presencia na raya pirenaica de los protoceltas, unos supuestos celtas de los que nun se sabe casi nada, nel 900 a.C, que se fueron moviendo hasta l’occidente pola presión de los iberos.
El Sellón, Les Tarandielles…
Hai que constatar la esistencia d’otros nombres nel entornu de Gancéu como’l Sellón, un hidrónimu “con maquinaria” según cuenta’l Llibru de los Testamentos de la catedral, nel añu 921, en que se redactó’l testamentu del rey Ordoño II. N’actualidá ye un prau cercanu al ríu Mestres.
Les Tarandielles ye un pueblu de la vecina Priesca, deriváu de Taranis, dios del truenu. Tar(a)nu en La Espuncia y Carda de Riba –al pie de l’antigua Venta-, de la misma procedencia. El ríu Carrión o Carrioncín que ye una de les divisories tradicionales de Gancéu. Calamúa, un pueblu de La Madalena con una base prerromana ‘kal’ o ‘kar’, que trata de la dureza de la piedra, posiblemente céltica.
Tamién guarda relación colo celta’l topónimu Toroyes y la ampliu territoriu asitiáu na base del pueblu de La Quintana, en Priesca, na cara de la Parea de Gancéu.
En cualquier casu ye interesante’l fervollar d’un tema tan interesante como esti.