Una ciudá romana

Nel oriente d’Arxelia hai una villa francesa en decadencia qu’está edificada, desde la llegada de los franceses en 1835, sobre una antigua ciudá romana bien conservada. Contaba, y cuenta, con un magníficu teatru nel lladral occidental que tovia se caltién, un templu a Venus -a quien se-y dedica la ciudá, Colonia Venerea-, otru a Belona, a Iovi, etcétera.

Panteones

Nel camín que coducía hasta ella, paralelu al mar, asitiábense unos panteones funerarios ente los que destacaben los de los nonagenarios d’Emilio Ballator y Sexto Octacio. La calle principal ye, hoi por hoi, la misma arteria de los romanos, el ‘cardo máximus’, bautizáu polos franceses como la Vía Nacional, aunque anguañu lleva’l nombre d’un muyahidín de la guerra contra los franceses que vixila la ciudá, arma en mano, desde’l centru de la avenida, arrodiada de palmeres. Conserva popularmente’l nombre francés de Les Arcades, nuna parte, y notra Les Alées (Los Caleyones). Xusto nel centru, a la manzorga, hai un preciosu palacio que fue quemáu na guerra de 1962, y asina sigue.

El cisma donatista   

Cruza’l ‘documanus’, en cuya parte más representativa estaba la iglesia principal de la villa, que fue volada, pero mantién el nombre del templu. Lo curioso ye que, anteriormente ya había otra iglesia de cultu donatista, de seguidores del obispu cartaguense Donato Magno (312), desde principios del cristianismu. El donatismu ye un cisma del reinu de Numidia que tenía equí salida al mar. Pertenecía a la órbita de Cartago, tenía denominación cartaguense, Rusicada, qu’evolucionó, sabe dios como, hacia Esquidda. Diferenciábense, ente otres coses, en que non querín pertenecer a Roma. La ciudá permaneció vacía hasta la llegada de los franceses que edificaron una villa diz que marsellesca, poblada básicamente por bereberes/árabes, italianos, alsacianos y hebreos que convivieron ellí hasta la espulsión de los europeos y xudíos.

Un pueblín como Tazones

Al occidente atopábase Estora, un pequeñu pueblín asemeyáu a Tazones o Viavélez que ye’l que-y da sonadía a la zona tradicionalmente, hasta que resurde sobre la ciudá romana Philippeville y dempués Esquidda, anque la bahía sigue llamándose Estora. Ye llamativu’l nombre européu d’Estora, relacionáu con Asturies. Podría venir de la época en que se creó’l Reinu de los Vándalos y Alanos -sinón anterior-, ocupáu a los romanos nel 476. Esiste una isla nel mar Bálticu que se llama esactamente igual.   

En Estora, qu’está a unos tres kilómetros de Esquidda, había hasta fai pocos años un puertu romanu que se perdió pola construcción del actual nuevu puertu pesqueru, magar que tovía se ven bloques de piedra antiguos. Tamién se percibe un puente en desnivel, que conserva lo romano parcialmente, dempués d’una ‘meyora’ introducida poles instituciones. Hai una asociación local que denuncia esta destrucción. Nes agües de la zona, a unos venti metros, esiste un peciu con xarros d’esa época que se puede visitar.

Atropar agua

Ente los dos pueblos hai montes con una sistema de recoyida pluvial d’agua de la época romana como pude ver. Con depósitos, qu’inda se conserven, magar que’l crecimientu de la ciudá, en griesca con los restos arqueólóxicos, podría destruilos. La villa, qu’anguañu tien más de trescientos mil habitantes, nun da abastu pa suministrar agua a una ciudá que yá tenía suficiente líquidu fai mas de dos mil años. Los romanos solo construíen n’ónde hubiera agua suficiente. Nesa época de xuru que nun había tantu plástico nin tanta porquería.