En Villaviciosa tocábase’l serpentón
Carlos Ciaño (Villaviciosa 1855 – L’Habana 1925), cuenta que siendo él guaje conoció a los que llama, humorísticamente, los “maestros cantores”. Una cuatriada de voces que sobresalín na Villaviciosa decimonónica. Estos cuatro Pavaroti yeren: Don Anselmo, un eclesiásticu de pelleyu duru que pasaba’l tiempu faciendo sermones y cantando canciones antigües que-y recordaben los tiempos provechosos. “Tenía un pie en la cordura y otro en la demencia”, resume Ciaño.
Un tenor dramáticu
Melitón yera un mecíu de remeru y Almirante de la Flota. Él yera’l tenor dramá-ticu y tenía un timbre que se “adelantaba al sonido eléctrico”. Pero en realidá podría dicise que yera un tenor facasáu. Tenía “una voz lúgubre, incolora, una voz capaz de enfrentarse al terror mismo”.
Alonso de la Vallina, llamáu el Merín, o Sabachoz, hombre entráu n’años, yera mullidor de la Cofradía del Nazarenu. Diz que yera “bajo de estatura, patizambo y contrahecho”. Alonso cantaba baxu, con cierta intuición artística. “Carecía de registro medio” y nunca entendió de matices ni modulaciones: asaltaba les notes baxes sin esfuerzu, como si lu llevara na so gorrumba cuadrada.
El barítonu tocaba’l serpentón
En cuantes al barítonu, esti yera insignificante, de vida oscura. Llamábase Ramón. Tenía un mote un pocu porconzón que non merez la pena reproducir equí. Cantaba como falaba, un puquiñín más altu. Les rares veces que los amigos lu dexaben esmoreñando un sólu, parecía empeñáu en mantener un diálogu a apellidíos con un interlocutor invisible y lexanu. Pero la mayor particularidá del susodichu ye que tocaba’l serpentón.
Tocábalu con desacostumbrada aplicación. Un instrumentu que desaparecía en tolos sitios menos equí, nesta Villa, por suerte conservadora. Diz que les honres fúnebres yeren especiales, resultaben fuertes soníos de serpentón o tuba, que tien un soníu mui asemeyáu, acompañando a cantores y cures nos asuntos de misa.
Un soníu que repigaba
Decía Ciaño que’l serpentón respigaba guapamente, con esi grave soníu telúricu que lu caracteriza. “No lo volví a oír en todos los días de mi vida”. Trátase d’un instrumentu de vientu-metal consistente nun tubu cónicu, allargáu, con una forma que s’asemeya a una serpiente, d’onde vien el nombre. Cuenta con una boquilla como’l de los instrumentos de vientu, pero tien los furacos de llau como los de vientu-madera. Suel tar fechu de madera, de nozal, y la parte de fuera atópase recubierta de cueru escuru.
Pesie a ser un instrumentu de madera, o quizás por esta razón, tien furacos en vez de válvules. El serpentón clasifícase, nel sistema Hornbostel-Sachs, como un instrumento de vientu-metal, nel nivel de les trompetes. Ye descendiente del ‘cornetto’ y un antepasáu distante de la tuba.
Un esfuerzu pulmonar
Magar qu’esti instrumentu nun tien la misma rixidez pa la manipulación qu’otros instrumentos de vientu, el serpentón pide un esfuerzu estraordinariu del que lu interpreta, pues ésti debe seleccionar el tonu del instrumentu na so realización colos llabios.
Más alantre los serpentonistas escomenzaron a sostener l’instrumentu n’horizontal pa so execución, lo que requería invertir la palma de la mano derecha variando la posición de los deos. Nes memories de Jean Lebeuf afírmase qu’esti instrumentu fue inventáu pol canónigu Guillaume, n’Auxerre (Francia) en 1590, p’acompañar los coros nos oficios relixosos, reemplazando l’órganu nes iglesies. Con tou y con eso, a partir del XVIII, tamién fue utilizáu na música militar.
Nel XIX utilizóse nes orquestes sinfóniques: Mendelssohn consagrólu a una parte del oratoriu Paulus; Berlioz echó mano dél na sinfonía Dies Irae. Tres un abandonu progresivu, a mediaos del XIX, el serpentón fue redescubiertu na década de 1970, n’Inglaterra, pol luthier Christopher Monk. Michel Go-dard introduzlu nel jazz en 1979.