El 28 ye, ¿cómo dicen?, “la fiesta de la democracia”. ¡Buf! Un añu más y como en toles comunidaes autónomes de tercera división, Asturies, más bien de rexonal, coinciden les nueses elleiciones col 25 de mayu. Esti añu, por primera vegada, ye cellebráu pol gobiernu asturianu, anque seya con un descoloríu “Día de la Bandera”. Cuando Napoleón entra n’España, lo que nun fora esautamente una invasión porque llegó atendiendo a la llamada de los borbones peleaos, padre y fíu, l’inútile de Carlos IV y’l rastreru del que diba ser Fernando VII. L’emperador corsu, en viendo, son pallabres suyes, “la dinastía más infame que conociera”, decidió sentar nel tronu de Madrid al so hermanu Xosé, un home illustráu y republicanu que nun compartía los petites imperiales.
Demos la pallabra a Pí i Margall: “Llevantose la primera Asturies, que tamién fora la primera contra los árabes.
Aquel reinu hispanu, aquel imperiu, nun yera una nación nin tenía mecanismos como talos. Son les instituciones tradicionales les que se rebelen contra los franceses. Les “provincies”, que tienen como únicu nexu d’unión la corona, alcuéntrense ensín rei, ensín esi nexu. Nesi contestu, les que tienen mayor pesu históricu porque fueran reinos y gozao d’independencia fiscal, respuendieron con mayor celeridá y contundencia.
Demos la pallabra a Pí i Margall: “Llevantose la primera Asturies, que tamién fora la primera contra los árabes. Ensín entrugar a denguna les sos vecines, ensin oyer otra voz que nun fora la de los sos ermunos sentimientos, encadarmó un gobiernu, declaró-y la guerra a Napoleón, organizó tropes y nun tuvo miéu pa despachar embaxadores que marcharon a solicitar el sofitu d’Inglaterra. Taba entóncenes aconceyada n’Uviéu la Xunta Xeneral del Principáu, ayalga, diz el conde de Toreno, dichosamente salvaguardada del cuásique xeneral esfarrape de los antigos fueros. Asturies invistiérala cola suma autoridá y enfotó nella los sos destinos”.
Hai elleiciones n’Asturies, una comunidá de tercera que avergonzaría a Flórez Estrada y a Pí i Margall.
El radical lliberal somedán, economista y profesor d’Oxford Flórez Estrada preside la Xunta Suprema y, el 25 de mayu de 1808, declara la guerra a Francia, recluta un exércitu popular a traviés d’una “proclama xeneral” y unvía a Llondres al conde de Toreno como embaxador, acompangáu por Álvarez de Miranda y Vega Escandón. Esi mesmu día Flórez Estrada escribe que “la llucha contra l’invasor nun tien xacíu si nun ye a un tiempu una revolución política”. Con ello venía a decir que daba lo mesmo qu’Asturies tuviera como amu a Napoleón o a los borbones. Nun yera cosa de cambiar de señor, sinón d’algamar la llibertá.
Toreno lleva una carta personal del presidente Flórez a Xurde III qu’el rei tresllada al parllamentu, de resultes de la que, previa llarga discusión, lores y comunes reconocen la soberanía d’Asturies, firmando un tratáu y unviando tropes al mandu de Wellington. Famosu fuera’l Reximientu Hibernia, col so estandarte verde con un harpa, que yera la guardia d’honor de la Xunta Suprema, formáu por voluntarios irlandeses. Y Toreno, como preba d’amistá, llogra la lliberación de los soldaos asturianos presos en penales británicos dende lo de Trafalgar, que vuelven a casa con él. Namás que reclamó los presos asturianos, non dengún otru.
Mentanto, los asturianos llevantábense nes villes y nes ciudaes. Uviéu enteru alzárase con dos muyeres al frente, Xuaquina Bobela y María Andallón, y’l so exércitu regular, con reximientos de tol país, dende Ribeseya y Villaviciosa a Castropol oponía resistencia a los mariscales de Francia qu’entraben per Tarna y per Payares. Entá ye’l día de güei qu’hai perros en munchos pueblos d’Asturies que lleven por nome Ney, el mariscal particularmente odiáu polos sos métodos represivos y la so vesania pa cola población.
Volvamos al presente. Hai elleiciones n’Asturies, una comunidá de tercera que avergonzaría a Flórez Estrada y a Pí i Margall. Los representantes del país yá nun son illustraos radicales sinón funcionarios de partíu, y aquella idega de que yera indiferente qué amu teníamos porque lo importante yera la llibertá y la ciudadanía camudó a una retafila d’eslóganes al serviciu de xente poco illustrao y ayenos al país como Sánchez o Núñez Feijoo. Y de “Asturies, nunca vencía” pasamos a “Asturies, la subordinada”. Eso sí, porque los asturianos d’agora nun somos aquellos, nin apreciamos la illustración nin tampoco la llibertá.
