El nuevu conseyeru d’Ordenación del Territoriu, Urbanismu, Vivienda y Drechos Ciudadanos, y lo mesmo tamién d’Hermenéutica, Estratexa Simbiótica y Grandes Espresos Europeos, plantega la puesta en marcha del proyeutu d’Asturmetrópoli. Ovidio Zapico diz, y asina lo desplicó a la Cámara de Comerciu d’Uviéu, que ye mester construyir un gran espaciu central que tea la virtualidá d’algamar aídes y fondos de la Unión Europea. Y diz, testualmente, que hai qu’entamar “dende cero”. A Carlos Paniceres, presidente de la cámara, la cosa suénai bien y especialmente esa idega del conseyeru de tener un enfoque “amable pa Uviéu”.
Tamos en 1979 y nesi estudiu falábase de la necesidá de configurar un área metropolitana policéntrica ya un metrotrén qu’enllazara los sos núcleos. ¿La cosa suena, verdá? Pues ye d’hai 45 años. Nada se fizo. Nada.
Cuando entamó la transición y llegara’l réxime autonómicu, en plena crisis de los setenta, les reconversiones, y col esbaraxe soiopolíticu que supuso la muerte de Franco, y que n’Asturies vino coincidir tamién cola crisis de l’agricultura tradicional y de la sociedá rural, SADEI espublizó un estudiu de gran importancia: “Asturies, añu 2000. Desamen críticu d’un futuru inciertu”. Tamos en 1979 y nesi estudiu falábase de la necesidá de configurar un área metropolitana policéntrica ya un metrotrén qu’enllazara los sos núcleos. ¿La cosa suena, verdá? Pues ye d’hai 45 años. Nada se fizo. Nada.
Los nomes fueron cambiando: Ciudá Astur, Área Metropolitana, Asturies Central... y agora paez ser qu’Asturmetrópoli, y partiendo “de cero”, sigún diz Zapico. Nel fondu, los programes y les propuestes lleven siendo los mesmos dende 1979, coles mesmes recetes y la última tan destinada al fracasu como la primera, y con más claridá por, precisamente, el tiempu que pasara. Y, frecuentemente, detrás de los proyeutos siguen tando los mesmos políticos y los mesmos teunócrates y los sos alumnos aventaxaos.
Nunca hai una visión medianamente clara y que nun seya a curtiu plazu, razón pola que, 45 años dempués, nada tenemos, porque planificar a mediu sieglu con cortoplacismos d’añu elleitoral ye imposible. La preba’l nueve: el conseyeru basa tol so programa en la intención de que lleguen perres de la Unión Europea. Esto ye lo de siempres: el pa qué nun importa, sinón namás qu’el cuanto.
Lo de que la nuea área seya “amable con Uviéu” debe ser porque enantes fuera “antipática” pa cola capital, ye de suponer. Igual ye volver a falar del “cerco”, de connotaciones guerracivilistes. La realidá ye qu’Uviéu nun se fía de Xixón, Xixón nun se fía d’Uviéu, Avilés de denguna de les dos y agora Siero tien un poder que nun tenía hai cuatru décades. Y en Mieres, ¿qué van decir dempués de l’astracanada capitalina sobro la escuela de mines?
Deberíen entrugase que, si en cuásique cincuenta años fora imposible facer nada, ¿pa qué incidir nello y reincidir en polítiques que nacen fracasaes y nun dar l’asuntu por perdíu y gastar esfuerzos y dineru públicu notres coses?
No que sí hai consensu ente los llistos y pensantes ye qu’hai que, de pasu, suprimir conceyos rurales. Neso lleven d’alcuerdo dende los años setenta. Tampoco fue posible porque, primero, nun tien xacíu, y, segundo, porque esos conceyos tomen a coña la ciudá metropolitana, sabiendo que nunca va esistir formalmente. Y hai que decir lo de “formalmente” porque na realidá yá esiste: l’ochu asturianu compórtase como un espaciu urbanu, pero con enormes disfunciones. Por nun tener, nun tien nin un sistema de tresportes coordináu, multimodal nin eficiente.
El conseyeru reconoz que van alfrentase a un problema seriu y dizlo con sinceridá: atendiendo a los antecedentes, ye consciente de que “cuerremos el riesgu de perder credibilidá”. Nun hai riesgu dengún, non, ye que la credibilidá yá ta perdía dende hai años, cuando menos dende’l mandatu de Fernando Lastra, por nun maltratar a los anteriores que pagaron cares la so bisoñez y la so disciplina al mandu políticu d’ellí y al mandu sindical d’equí.
Deberíen entrugase que, si en cuásique cincuenta años fora imposible facer nada, ¿pa qué incidir nello y reincidir en polítiques que nacen fracasaes y nun dar l’asuntu por perdíu y gastar esfuerzos y dineru públicu notres coses? En ciencia, nel conocimientu, cuando observamos qu’una llínia d’investigación ye improductiva dempués de varios intentos, y 45 ye un llargu períodu, espublícense les conclusiones, colo qu’otros nun pierden el tiempu nun camín que nun tien salida. Y, dende lluéu, aparte de nun volver a confiar, los ciudadanos y les instituciones nun seguiríen financiando a quien ta emperráu en volver a lo mesmo pa llegar a la mesma conclusión de que nun hai solución posible.
