domingo 05.07.2020

Exemplu, recuerdu y honor

Celestina Sáncez y Xosé Naveiras  Pepe’l Ferreiro.

Hai díes nos que tal paez que los astros confabúlense contra tí o contra los tuyos, hailos inclusive nos que los dioses, como pensaben los antiguos, abandonen a toa una nación, permitiendo que los males y les gafures caigan sobo ella. Esti fin de selmana pasáu fora un momentu d’esos negros pa la cultura asturiana. Con poques hores de diferencia morríen dos figures icóniques d’esti país: Celestina Sánchez y Xosé Naveiras. Munchos sabrán d’ellos polos sos nomes de bautizu pero otros munchos de xuru que los conocen como Celestina Cá Sancho y Pepe’l Ferreiro.

La historia de Celestina ye la de munches muyeres, tamién d’homes, pero la tradición musical más doméstica, dende les añaes ata los romances, yeran más de muyeres, especialmente nel occidente, onde los instrumentos de percusión son perimportantes.​

Celestina yera d’Ambás, nel conceyu de Grao y fora una muyer de pueblu, una aldegana como tantes otres. Y como tantes otres, como la mayoría de les muyeres rurales asturianes, y munches urbanes porque Asturies fora un país rural ata los años setenta, cantaba, recitaba, sabía histories… Tuvimos la suerte, non ella sinón nosotros, los asturianos del presente, de qu’un ñetu-y sacara tolo que sabía. Ye Xosé Ambás, al que munchos conocerán de la televisión y de les sos escursiones cantando y recopilando pieces peles cocines, les antoxanes y los corredores. Celestina Cá Sancho convirtiérase nuna figura central na recuperanza de la música tradicional y viera como los sos cantares acabaron en discos, grabaos por xente mozo y escuchaos con devoción por miles de persones.

Pepe’l Ferreiro, ferreru y fíu de ferreru, entamó hai décades a montar lo que diba ser el Muséu Etnolóxicu de Grandas de Salime.

La historia de Celestina ye la de munches muyeres, tamién d’homes, pero la tradición musical más doméstica, dende les añaes ata los romances, yeran más de muyeres, especialmente nel occidente, onde los instrumentos de percusión son perimportantes. Ya esos instrumentos, pandeiros y panderetes, yeran propios de muyer, como la gaita o’l vigulín yeran más d’homes, anque de tóo hebo y, agora, nun mundiu más abiertu, entá muncho más. Fora la complicidá d’un ñetu lo que fixo de Celestina un iconu de la nuesa cultura, ata’l puntu de ser visitada por músicos ya investigadores de decenes de países de la Europa atlántica. Hebo ehí dalgo que perdimos en bona midía: la continuidá cultural, que dase cuando los nuevos son conscientes de la so heredá y de la grandeza d’ella. Y deciden sacar a los vieyos del arcón y revindicalos, revindicando asina una historia ya un país.

Pepe construyó un muséu activu ya interactivu, nel que les pites nun taben disecaes nin enxaulaes sinón qu’andaben abeyando pellí, onde la fragua nun se prendía pa que la vieren los turistes sinón que yera la de siempres, la de la familia de los ferreros de Grandas, la suya

Pepe’l Ferreiro, ferreru y fíu de ferreru, entamó hai décades a montar lo que diba ser el Muséu Etnolóxicu de Grandas de Salime. Nun momentu nel que los oficios rurales, la estructura preindustrial, amoriaben nos nuesos conceyos y cuando los museos d’esi tipu yeran más tanatorios pa embalsamar lo que creyíen muerto, Pepe construyó un muséu activu ya interactivu, nel que les pites nun taben disecaes nin enxaulaes sinón qu’andaben abeyando pellí, onde la fragua nun se prendía pa que la vieren los turistes sinón que yera la de siempres, la de la familia de los ferreros de Grandas, la suya. Al final “funcionarizáronlu”, lo que-y vinía bien por aquello de la seguridá social y de la xubilación cuando viniere, pero siempres fora indisciplináu y amigu d’andar pel mundiu a la so manera. Ata se metiera en política, pero la cosa nun pintó bien.

El muséu de Grandas de Salime ye exemplu de muséu etnográficu nel mundiu y, anque contara con sofitos, fora Pepe l’alma d’aquello. Pero chocó col despotismu nada illustráu d’un gobiernu asturianu que lu echó  pa poner al frente a un home del partíu que yera segovianu y que falaba mui bien catalán. Nun lu dexaron nin llevar la ropa porque, como nun yera un muséu-tanatoriu, la ropa del ferreru que colgaba nel percheru yera la suya, non una fecha de mentira copiando la d’un ferreru de los años cuarenta. Faltáben-y dos años pa xubilase, colo que la vesania d’aquel gobiernu d’incultos, de cuyos miembros yá naide se recuerda salvo qu’acaben nalgún xulgáu, fora descomanada.

Esta ye la historia d’Asturies, la nuesa historia, na que sólo la voluntá ya’l trabayu bien fechu ye a llevantala, seya la d’un paisanu o la d’un mozu ya una güela. De les altures de Fruela, de Suárez de la Riva y de la mayoría de los ayuntamientos poco puede esperase.

Exemplu, recuerdu y honor
Comentarios