lunes. 08.08.2022

Gaudeamus

Gaudeamus

Nun podemos dicir que la tresvolada política asturiana llegara, cola polémica sobro los graos, a la universidá porque tamién la universidá asturiana anda atorollada dende van décades. Cuando se cellebraran los fastos del tercer centenariu de la institución fundada por Valdés de Salas, alló pol 1908, metanes la envarada sesión pública que los académicos ofrecieron, ente togues, birretes y llibros sapienciales, una rapaza de traces campesines llevantose y glayó "¡viva la nuesa universidá!". Tala yera la identificación de la sociedá cola so "alma mater", avanzada y abierta al mundiu, y, al empar, identificada y comprometida col país.

Los debates dende hai años son propios de polítiques municipales, como si la llocalización de la universidá fora lo mesmo que la d'una oficina d'abastos o d'una distribuidora de corsetería.

Dempués de la guerra civil, salvada de la desapaición gracies al rector Sabino Álvarez Gendín y colos bonos oficios de Carmen Polo, pero con una purga mayúscula del so claustru, la Universidá d'Uviéu entró na irrelevancia. Entá agora, pente toles universidaes del reinu ye la que menos implicación tien nel territoriu nel que s'asitia. Ta n'Asturies como podría tar n'Arizona o en Madagascar. Y a esa llaceriosa situación nun son ayenos los llocalismos pueblerinos que, otra vuelta esti añu, ocupen el debate publicitáu, que non públicu. Agora ye la ubicación de les nueves graduaciones, cola griesca tradicional ente Xixón y Uviéu, a la que vién a sumase Mieres y naide nun entiende por qué Siero o Avilés nun entraron a pedir un cachín de pastel.

Dicía Xovellanos que la clave del progresu taba en poques universidaes y bien dotaes, y la historia, una vuelta más, vien a dar la razón al illustráu xixoniegu

Los debates dende hai años son propios de polítiques municipales, como si la llocalización de la universidá fora lo mesmo que la d'una oficina d'abastos o d'una distribuidora de corsetería. En toa esta discusión de yá más de trenta años nunca supimos de razones académiques, científiques o metodolóxiques sobro por qué yera meyor un sitiu qu'otru. La sociedá asturiana asistía ensín sospresa a ver cómo una facultá o una escuela formaba parte de los programes elleitorales y ensín conocer lo que pensaba l'academia. Y asistía ensín sospresa porque esa ye la manera de facer n'Asturies, un país especializáu en pedir fondos pa crear museos o impulsar festivales, al marxe de la rentabilidá económica y de la utilidá social. Nesi facer a l'asturiana, la universidá yera cosa d'habilitar un edificiu ensín preguntase pa qué.

Dicía Xovellanos que la clave del progresu taba en poques universidaes y bien dotaes, y la historia, una vuelta más, vien a dar la razón al illustráu xixoniegu. España nun ta precisamente nos primeros puestos universitarios del mundiu, siendo como ye onde más universidaes se crearon nun par de décades. Nun fue posible poner una en cada municipiu de más de 50.000 habitantes, pero pocos deben ser los que nun tienen una escuela o una facultá.

Y les universidaes que tan meyor situaes nel ranking internacional son, a lo meyor por casualidá, vaya vusté a saber, les que tienen un únicu campus. Actualmente, un estudiante d'economía puede tar cursando asignatures de mediu ambiente o d'antropoloxía, pero difícile-y resulta si tien clase a les 9 n'El Cristo, a les 11 en Mieres y a les 12 en Cabueñes. Nun tien razón el rector Villaverde cuando diz que lo importante son les titulaciones y non onde les imparten. Nostante, mester ye reconocer que ye'l primer rector que toma una decisión con criterios académicos, digan lo que digan los alcaldes y les "fuerces vives".

Perdiérase de xuru la oportunidá nos años ochenta de facer una universidá coherente con dos campus estremaos, ún el de les titulaciones clásiques de les facultaes n'Uviéu ya otru politécnicu en Xixón, aprofitando les instalaciones yá programaes y l'edificiu d'una universidá llaboral que se dexaba morrer por fatos prexuicios ideolóxicos. Podíen ser dos universidaes distintes, una Politécnica d'Asturies ya otra d'Uviéu, o caltener una única col nome históricu. Eso yera cuestión menor ya indiferente, anque la primer opción podía poner sordina a los desvaríos, Machado "dixit", de campanariu, porque nada quitaba a la preesistente y dalgo daba diferencial. Tovía nes elleiciones de 2003 esta posibilidá plantegára'l Partido Popular, coincidiendo llamativame con Andecha Astur, cola diferencia de qu'el PP falaba d'una institución semiprivada, una triba fundación.

La tochada del alcalde d'Uviéu, desenterrando otra vuelta'l "cercu", llamando a la movilización porque la escuela mines ye, sigún el so director, "una marca de ciudá", namás ye comparable a los conceyales de Xixón qu'acusen a l'alcaldesa de nun defender los intereses de la villa, colos espatuxes, por exemplu, de Foro.

Les grandes universidaes del mundiu son verdaderes ciudaes, dalgunes con una autosuficiencia considerable ya un poder notable, ata'l puntu de ser la institución más importante del municipiu, rexón o condáu nel que tan asitiaes. Son entidaes sometíes a les lleis civiles, penales y mercantiles, evidentemente, pero non a les polítiques llocales o estatales, y menos tovía moneda de cambiu en elleiciones o deldores d'un partíu políticu concretu. Inclusive les de titularidá privada tienen un conseyu o un patronatu directivu que controla la so productividá, l'esitu de los sos titulaos, l'impactu de les sos investigaciones, pero al que nun se-y pasa pel maxín metese en qué titulaciones se dan nin en qué edificios se trabaya.

La tochada del alcalde d'Uviéu, desenterrando otra vuelta'l "cercu", llamando a la movilización porque la escuela mines ye, sigún el so director, "una marca de ciudá", namás ye comparable a los conceyales de Xixón qu'acusen a l'alcaldesa de nun defender los intereses de la villa, colos espatuxes, por exemplu, de Foro. ¿De dalgunos sentimos una razón tansiquier de carácter científicu, estratéxicu o metodolóxicu? Tampoco los dan los gobiernos de Mieres o Xixón, sacantes apelar a deldes históriques que nun sabemós cómo pueden ser académiques, a niveles de paro nel conceyu o a que tienen fondos europeos qu'hai que gastar como seya, siguiendo los criterios clientelares imperantes dende la transición y'l réxime autonómicu.

"Gaudeamus igitur, alma mater floreat".

Gaudeamus
Comentarios