La situación a la que ta llegando la fuelga de los emplegaos d’Itvasa, que paez ser que, cuando menos, va prollongase ata selmana santa, oseya, dos menses más, ta derivando nun problema económicu y de seguridá de primer orde. El conflictu llaboral de los trabayadores de les estaciones de inspección de vehículos tien unes carauterístiques peculiares, más allá de les revindicaciones concretes, nes que nun entro, puesto que ye una empresa propiedá al cien por cien del gobiernu d’Asturies y en réxime de monopoliu.
El ciudadanu nun lleva’l coche, la moto o’l so vehículu industrial o agrícola a una inspección por propia voluntá, sinón que ta obligáu pola llei, pagando pol serviciu y apoquinando tamién pol impuestu de valor añadíu, lo que sedría bastante discutible, especialmente equí, con una empresa pública, porque nun queda claro si esi pagu ye un preciu o ye una tasa. Si esi ciudadanu circula col so vehículu ensín el sellu de la inspección, puede ser multáu.
En 2016 la media de díes pa una inspección n’Asturies yera de 84 díes, mientres que yera de 4 en Cantabria, Llión y Llugo. Y en 2020, al acabar el confinamientu la covid, mientres n’Asturies tardaben n’atender 115 díes, en Llión yeran 30, en Llugo 32 y en Cantabria 25.
Más allá d’estes consideraciones económiques, mester ye llamar l’atención sobro la mesma naturaleza xurídica del trámite de pasar una inspección técnica de los vehículos, unos 700.000 n’Asturies, que son tóos esceuto los que tienen menos de cuatru años. La razón primera y última pa esa revisión periódica ye protexer a les persones, la seguridá de los conductores y del restu de los ciudadanos, conduzan o non.
A día de güei, el plazu dende que se pide cita ata que se pasa la inspección ye de 112 díes nes estaciones del centru y de 80 nes del oriente y del occidente. Ye llamativo que nun se apreciaron, dempués de tres menses nesta situación, que los volumes de tráficu disminuyeran sensiblemente. Seguramente hai una razón mui llóxica: munches persones, especialmente los profesionales, nun pueden tener paráu l’automóvile durante 112 díes, esto ye, tres menses y mediu. De ser verdá esto, y tien tola traza de selo, ye incomprensible qu’una alministración, propietaria amás de les estaciones, nun considere mui grave la situación. Esa alministración ta impidiendo que los ciudadanos cumplan la llei y, paralelamente, descuida la seguridá de tola población nes víes públiques.
n’Asturies refuguen na primera inspección al 32 por cientu los coches y motos, mientres que nel conxuntu d’España esi procentax ye del 17
Ante un horizonte de paralización del automóvil o riesgu de sanción, les escursiones a estaciones de comunidades llimítrofes ye una práutica habitual. Nostante, esi preregrinax nun ye namás que d’agora, sinón que ye cuásique una tradición dende hai ochu o diez años. Yo mesmu, enantes de la fuelga d’agora, pasé una par de vegaes la revisión en Cantabria.
El problema ye, polo tanto, estructural, nun vien dáu pola coyuntura. En 2016 la media de díes pa una inspección n’Asturies yera de 84 díes, mientres que yera de 4 en Cantabria, Llión y Llugo. Y en 2020, al acabar el confinamientu la covid, mientres n’Asturies tardaben n’atender 115 díes, en Llión yeran 30, en Llugo 32 y en Cantabria 25. A ello contribui, y muncho que n’Asturies refuguen na primera inspección al 32 por cientu los coches y motos, mientres que nel conxuntu d’España esi procentax ye del 17. Los indicadores pa camiones llixeros son de 46 a 24 y pa los pesaos de 52 a 29. Esto yá entama a escamar a la Comisión de la Competencia porque los criterios son los mesmos pa toles comunidaes, por tar marcaos per una llei común. Tamién influi el fechu de que notres comunidaes, por exemplu, tienen horarios más flexibles o esisten equipos móviles pa la inspección de vehículos agrícoles, de manera que nun colapsen les estaciones normales.
Ye una situación completamente anormal qu’un gobiernu, responsable n’última instancia de la seguridá y de que la llei se cumpla, y que, nel nuesu casu, ye quien cobra al ciudadanu un preciu monopolista fixáu por ella mesma, actúe como si la cosa nun la concerniere.
