Al final hebo corría toros en Benia, nel conceyu d’Onís. Vamos pasar per alto la burlla a la llegalidá asturiana del esperpentu y’l fechu de qu’entá nun queda claro quién tien les competencies pa decidir si se pueden reunir dos mil persones con seyes animales pelligrosos y diez o doce homes portando armes blanques de más de cuatro deos, esto ye, illegales na mayor parte de les situaciones. Tampoco queda claro a quien compete permitir o non la matanza de reses en público, xestionar los restos orgánicos y velar pol bientar animal.
Hebo notables representantes de los poderes públicos na plazamóvil de Benia, ensín duldia exemplos de la sociedá y de la cultura asturianes...
N’Asturies prohibieran hai tiempu matar el gochu en casa sigún la costume, pero, aínda más, que los neños garraran coríos nel puertu pesqueru o escuerrieran un gochín engrasáu nel prau la fiesta pol estrés que suponía pa los animales. Acabarán prohibiendo l’arrastre con güés, la doma d’asturcones y les carreres de caballos. Pero paez que picar con una llanza a un toru, espetái seyes arpones y matalu a espada con, si hai suerte, un pinchazu, pero que pueden ser tres, cuatro o cinco, y rematalu con un puñal trespasando’l bulbu raquídeu, ye “bien d’interés cultural”. Cultura española. ¿Cómo yera aquella canción de la bandera?: “llevas sangre en el fondo de tu alma”. Pues eso.
El conceyu d’Onís entró na historia de la infamia y, amás, traicionando la so propia cultura. Pero, vamos ser serios, ¿cuántos vecinos d’Onís y, en xeneral del oriente asturianu y d’Asturies toa taben na sangrienta ceremonia? En viendo l’asistencia, nun paez que munchos. De fechu, nun se llenó la plaza, y eso que yera, sigún los patrocinadores, pa 2.700 persones, que, n’agostu y al pie Los Picos d’Europa, debería llenase ensín tansiquier publicidá. Con unos cuantos autobuses de taurinos con un paquete de pocos euros, unos cientos de turistes y dalgún del llugar, que podrá habelos, yá ta la cosa rodao.
Paez importante pa dalgunos grupos bien concretos qu’Asturies siga apaeciendo como la cuna de lo que pa ellos ye’l formientu imperial
Hebo notables representantes de los poderes públicos na plazamóvil de Benia, ensín duldia exemplos de la sociedá y de la cultura asturianes, como’l diputáu de Vox por Madrid Iván Espinosa de los Monteros y como Rocío Monasterio, matrimoniu por ciertu, diputada y portavoz de Vox n’Asamblea de la Comunidad de Madrid. Sí que taba, nun podemos negalo, un diputáu de la Xunta Xeneral, Ignacio Blanco, tamién de Vox. Reciella, que sigún el diccionariu académicu ye, na so cuarta acepción, “xente de poca importancia”.
El conceyu d’Onís ta siendo inxustamente tratáu, apellidándolu de sanguinariu, atrasáu, tercermundista... Tóo indica lo contrario. La mayor parte los vecinos ta’l marxe d’esta barbaridá, d’esta amuesa d’incultura y barbarie, siendo munchos los qu’amuesaron a les clares la so oposición. Pero ye qu’una empresa puede poner una plaza portátil, comprar unos animales, contratar a tres matarifes que se ven como héroes de la Hélade, poner unos autobuses y practicar la tortura como arte en Benia, como podría ser en Tapia, en Noreña, en Felechosa o en Balmonte.
¿Por qué Benia? Porque ye conveniente. Asturies ta sufriendo un ataque descomanáu contra la so cultura embaxo un neoespañolismu de la peor triba. Paez importante pa dalgunos grupos bien concretos qu’Asturies siga apaeciendo como la cuna de lo que pa ellos ye’l formientu imperial. Vinieran hai poco los de l’Asociación de Escritores con la Historia, que son unos treinta, a poner la so pica en Cangues d’Onís. Viniera la gran intellectual y lliterata Isabel San Sebastián como platu fuerte, pa falar de Cuadonga y del “gran proyeutu”, de la “unidá de destín no universal”, una llarga marcha dende Pelayo ata Franco.
Y agora la noticia ye que nes vieyes tierres vadinienses recuperen la tauromaquia, qu’al pié’l monte sagráu del Auseva vuelve renacer la España eterna, la de, como escribiera Machado na so necrolóxica de don Guido, “el sangre los toros y’l fumu los altares”. Onís ye un simple escenariu d’una tochada que pagamos tolos asturianos. Eso sí, tampoco lo escaezamos, porque tenemos los gobiernos que tenemos.
