Esti domingu, 9 de xunu, tenemos elleiciones europées. La participación ye mui mínima polo xeneral. La xente nun se mueve pol parllamentu européu. Ye dalgo incomprensible. Aparte de consideraciones ideolóxiques o sentimentales, la realidá ye qu’el 75 por cientu de les normes que mos afleuten, a tóos nosotros, vien de Bruxelles y d’Estrasburgu. La normativa de telefonía ye europea, la normativa ganadera ye europea, la normativa sanitaria ye europea...
Pero los políticos españoles, que paecen salíos d’un furacu fuera del espaciu y’l tiempu, anden a otra cosa. Tamos xugándomos el futuru, el futuru d’una Europa democrática, esa Europa a la que los españoles y los asturianos debemos llibertá, renta y estabilidá. ¿Qué sería d’esti reinu heredáu del franquismu si nun fuera pola Unión Europea? ¿Qué perres tendría’l ganaderu, cuántes el de la reconversión, cuántes los conceyos desindustrializaos, ensín Europa?
Hai partíos que van a estes elleiciones pa, precisamente, dinamitar Europa. Son los de siempres, los heriedes de los nacionalismos imperiales más atrabiliarios, los que se rebocen na bandera, seya roxigulda o de tolos tricolores del continente.
Quieren que votemos polo de l’aminstía, pol asuntu de la muyer del presidente, poles babayaes de Díaz Ayuso, pola inmigración, poles guerres de Gaza y d’Ucraña. Non, non, non. Hai que votar por Europa, por esa Europa que ye más una idea, que ye una realidá entá probe y poco articulada.
Hai tres cifres que dicen muncho d’esta Europa, la de los lliberales y los socialdemócrates, la que dempués fue de los verdes y de les minoríes de toa triba. Eses cifres son 30, 60, 90. Los europeos somos el 30 por cientu de la población mundial. De cada 100 persones sólo 30 vivimos na Unión Europea. Pero producimos 60 euros de cada 100. Y, más importante, de cada 100 euros dedicaos a inversión y gastu social nel mundiu, 90 cuerresponden a Europa. Eso ye lo que mos xugamos esti 9 de xunu: que siendo tan pocos sigamos siendo acomodaos y, riba tóo, mantengamos un estáu de bientar capaz de protexer a los más débiles.
Yo soi un nacionalista asturianu, ideolóxicamente mui averáu al anarquismu, un tantu keynesianu no económicu...
Hai partíos que van a estes elleiciones pa, precisamente, dinamitar Europa. Son los de siempres, los heriedes de los nacionalismos imperiales más atrabiliarios, los que se rebocen na bandera, seya roxigulda o de tolos tricolores del continente. Son la drechona y tamién el fascismu, pero tamién esa esquierda anclada na guerra fría que sigue cola matraca de que la Unión Europea ye la Europa del gran capital. la oligarquía y de los monopolios. ¡Como si España, Francia, Portugal o Austria fueran repúbliques populares autoxestionaries! Non, non. La Unión Europea ye la estructura política más democrática que tenemos nel mundiu.
Cuando una organización ecoloxista choca col gobiernu, ¿qué diz?: apelaremos a la Unión Europea. ¿A quién recurre un español o un italianu cuando ve que ta afayáu?: a la Unión Europea. ¿En quién confía un ciudadanu amachucáu polos xueces del reinu d’España o de la republica de Rumanía?. a la Unión Europea. La Unión ye la garantía de xusticia, democracia ya igualdá.
Yo soi un nacionalista asturianu, ideolóxicamente mui averáu al anarquismu, un tantu keynesianu no económicu... ¡Vaya!, que soi un puntu bastante raru. Pero soi europeísta. Creyo qu’Europa ye la mio gran nación y preocúpame que la xente lo vea como dalgo llonxano y ayeno. Europa ye una idea, un proyeutu. Nun podemos permitir que la parasiten y la desguacen.
Voten lo que quieran pero piensen. Europa ye dalgo importante y ensín esi proyeutu regresaremos a lo peor de la nuesa historia. Piensen, delantre de la urna, nesi 30-60-90.
