domingo 29/11/20

Abandonu total

Ún de los espacios más rellumantes de la costa centruoriental asturiana ye, ensín duldia denguna, esa cadena de collaos, viesques y curielles que va dende’l Picu Fariu al Monte Deva, pasando pel Cordal de Pion. Son les fronteres de los conceyos de Xixón, Siero, Sariegu y Villaviciosa.

Tien l’epicentru esti espaciu na Peña los Cuatru Xueces, a poques llegües de mio casa, mesa artúrica de piedra antigua onde negociaben los rexidores de los cuatru conceyos la xestión de los pastos cada añu. Cuando aposentes nesa mesa viénente al alma vieyos vientos d’enxebres lleendes, de cuando los homes apautaben y roblaben con un apertón de manes. “Bien ta lo alcordao porque lo fixéramos ente iguales y, de nun ser asina, non”.

Agora les caleyes y troches d’esos montes tan feches una llaceria, nel abandonu total. Ye un pecáu esti típicu de los asturianos y, particularmente, de los gobernantes asturianos: el pecáu de despreciar lo propio. Paez mentira qu’un país gobernáu pola esquierda dende siempres, a lo menos por esa esquierda que Luis Arias llama con atináu xeitu “de siegles”, permita la privatización real de los sos espacios naturales.

Los caminos son simples tramos deportivos pa motos, pa motoristes trialeros urbanites ensín dengún escuplu. Ye más, como-ys paecen mui cómodos a dalgunos d’estos zopencos, tieren monte través y esfarrapen lo poco que va quedando. Y agora yá lleguen los turistes colos sos quad, que, soi claru, deberíen tar prohibíos sacantes pa usos ganaderos, porque son bonos instrumentos pal paisanu que tien les vaques, los caballos y les oveyes arribona.

Nun teo claro a quién pertenez esti espaciu, si a los conceyos, al gobiernu d’Asturies, a la Unión Europea o a la ONU, pero dalguién debería facer dalgo. Ye de vergoña ver cómo tan les coses: caleyes feches tritu, miradores baltaos, la mesma mesa los xueces nun estáu llamentable, les siñales rotes… Pero, por ser más cercano, desixo como ciudadanu y como contribuente que l’alcaldesa de Xixón y los alcaldes de Villaviciosa, Sariegu y Siero pongan remediu.

“El secretu pa siguir allantre ye entamar”, dexara escrito Mark Twain.

Abandonu total
Comentarios