La mocedá y l'asturiano
Les opiniones sobro la llingua asturiana de los xóvenes dexen les coses mui clares: les xeneraciones que van construyir el futuru d’Asturies conocen bien l’idioma, empléguenlu y quieren velu dignificáu socialmente. Asina lo amuesa l’estudiu “Los xóvenes y la llingua asturiana” que, por encargu de l’Academia de la Llingua Asturiana ya’l Conseyu de la Mocedá, realizara’l departamentu de Ciencies de la Educación de la Universid’a d’Uviéu embaxo la dirección de la profesora Isabel Hevia. Los resultaos son, ensín facer desaxeraciones, impresionantes. L’estudiu fíxose sobro una muestra de mozos comprendíos ente los 16 y los 29 años y que viven en 53 conceyos distintos. Lo primero que resalta ye qu’el 94,2 por cientu d’ellos entienden perfectamente l’asturiano, anque l’usu del mesmu presenta dalguna qu’otra diferencia.
Asina, el 67,5 por cientu considera que l’asturiano ye una llingua perfectamente válida ya útile pa cualisquier ámbitu, dende’l familiar al social, incluyíu tamién l’académicu y científicu. Empleguen indistintamente l’asturiano ya’l castellán a prácticamente partes iguales (43 y 49 por cientu respectivamente) cuando falen colos amigos ya un 33,9 recurre al asturiano nes redes sociales, particularmente nos correos ellectrónicos y nel whatsapp. Por embargo, el 73,8 prefiere l’español en contestos públicos, como la universidá, l’alministración y los comercios. Esti datu, que contrasta tan llamativamente colos otros, sopelexa que sigui esistiendo una discriminación ya una minimización contra l’asturiano, colo que los mozos recurren menos a esa llingua porque aprecien barreres por parte de los que, a día de güei, dominen los espacios públicos más formales.
Pesie a estes diferencies, los mozos equiparen en valor al aturiano con cualisquier otra llingua ya un 86,1 por cientu sofita la so oficialidá. Del mesmu móu un 80 por cientu considera que debe tar presente nel sistema educativu ya un 77,2 considera que l’asturiano, xunto col castellán, debería ser llingua vehicular nes escueles. A un tiempu, un 80 por cientu opina que l’asturiano debe tener nos medios de comunicación.
L’estudiu dirixíu pola profesora Hevia mayor presencia conclui afirmando que los xóvenes asturianos quieren polítiques de normalización qu’igualen al asturiano coles otres llingües del reinu, siendo como son un factor de dinamización, de xustificación y ata de desixencia de una nuea política cultural.
Asturies nun ye ayena a lo que ta pasando en toles sociedaes occidentales. Mientres los sectores más dinámicos del Reinu Uníu, los xóvenes, los emprendedores, los sectores de mayor nivel cultural, se vieron arrastraos a un brexit decidíu por xubilaos, medranosos escontra’l cambiu y sectores de baxu nivel cultural; y mientres que lo mesmo vimos nos Estaos Uníos cola ellección de Trump, cola oposición de California y l’este del país y, en xeneral, de los más xóvenes y cultos; n’Asturies ta pasando cola llingua lo mesmo. Cuando adicamos pa los debates públicos sobro la oficialidá, por exemplu, son los más mayores qu’ocupen pel momentu los puestos más relevantes y los que tienen dende siempres les columnas nos periódicos los qu’opinen y tal paez qu’esa opinión ye la única qu’esiste. Pero hai otra realidá más amplia, más dinámica y con más futuru. Si los xóvenes, que nun publiquen nos periódicos nin tienen cátedres na universidá, tovía, opinen como opinen, los vieyos reaccionarios tienen la guerra perdida. Porque la llóxica de la vida ye asina: los mozos partidarios de la llingua asturiana tienen muncho mar a proa, los otros tiénenla cuásique toa ya a popa.
