Hai unos menses hebo una campaña perimportante sobro’l conceutu de “la ciudá de los 15 minutos”, impulsada especialmente por Podemos, la parte minoritaria’l gobiernu. Ye de suponer que, tres la investidura y con amnistía o ensín ella, volvamos un poco a la normalidá no concreto y cuotidiano. El casu ye qu’un estudiu d’hai dos menses dizmos qu’el 61 por cientu la población reside a menos de 15 minutos andando pa cubrir les sos necesidaes esenciales, qu’esi ye’l criteriu. El plan aquel yera que naide tea a menos de 15 minutos andando pa cubrir les sos necesidaes básiques: la frutería, la carnicería, la panadería, el centru salú, la parada taxis, l’autobús, el cine, el café, el chigre, la ferretería...
El problema ye cómo parar un modelu económicu que, anque paeza lo contrario, nun perxudica a les ciudaes sinón, una vuelta más, al mundiu rural
Lo malo ye qu’esi criteriu como base d’un proyeutu cuásique revolucionariu ye una mala copia de los Estaos Uníos. Incluso les grandes ciudaes españoles tan cerca de cumplir con esa condición. En Barcelona el 99,5 por cientu de los ciudadanos ta a 15 minutos o menos de tóos esos servicios, en Valencia el 99,3, en Madrid el 91,3, en Zaragoza el 88,0 y en Sevilla el 86,0. Llamativamente, sólo Málaga cai a un 76,4. Y digo que “llamativamente” porque ehí ta’l problema. Málaga ye l’exemplu d’un urbanismu “typical spanish”, onde pavimentaran y alicataran la costa ensín pensar en nada más.
L’asuntu a abordar ye la urbanización masiva de dalgunas zones costeres, la proliferación de ciudades pantasmes que sólo respuenden a la especulación, el colapsu’l comerciu llocal y rural en llocalidaes pequeñes y pueblos, la competencia brutal de grandes superficies y d’empresas de venta a distancia. El problema ye cómo parar un modelu económicu que, anque paeza lo contrario, nun perxudica a les ciudaes sinón, una vuelta más, al mundiu rural. Los que tan a una hora de cualisquier serviciu son los habitantes del campu, esos que ponen al serviciu del turismu un paisax y un patrimoniu. Eso sí, ensín cobrar por ello.
L’asuntu ye alfrentar la urbanización masiva de dalgunes zones costeres, la proliferación de ciudaes pantasmes que sólo responden a la especulación, el colapsu’l comerciu llocal y rural en llocalidaes pequeñes y pueblos, la competencia brutal de grandes superficies y d’empreses de venta a distancia
Eso ye lo que ficieron con Asturies y, amás, en dalgunes zones, con cargu a fondos públicos. Por exemplu, con fondos mineros, porque yera mester gastar porque había perres pa gastar y, de pasu, cebar bien los duernos políticos, sindicales y empresariales, dedicáronse miyones d’euros a centros comerciales a gran distancia de los pueblos y villes. El comerciu llocal peslló por la competencia deslleal y la xente, en llugares más bien pequeños, quedó a media hora andando y en dalgunes ocasiones a media hora en coche de la ferretería, de la carnicería y de la panadería. De fechu, nos pueblos asturianos de la zona central, a día de güei, la mayor parte’l pan cómprase nes gasolineres. Un pan que ye una triba plastilina a les tres hores.
Asturies enllenárase de centros comerciales, munchos pagaos con aquellos fondos mineros, una gracia del SOMA y de la drecha, que ye lo mesmo. Agora resulta que tan lloñe, que la ciudadanía nun puede dir, especialmente onde ta mui avieyada, nes cuenques, por exemplu. Y l’asuntu ye que yá nun hai comerciu llocal, esi de los 15 minutos. Y tamién colaran pa los centros comerciales Correos, Lloteríes... Y agora piesllen. Lo del centru comercial de L’Entregu ye un exemplu de llibru. ¿Y agora qué? Y nun lo teo mui claro, pero lo del supermercáu a les afueres de Les Arriondes..., ver veremos.
L’asuntu a abordar nun ye lo de los 15 minutos, que debe ser importante en Nuea York o en Berlín, sinón otra mui estremada. L’asuntu ye alfrentar la urbanización masiva de dalgunes zones costeres, la proliferación de ciudaes pantasmes que sólo responden a la especulación, el colapsu’l comerciu llocal y rural en llocalidaes pequeñes y pueblos, la competencia brutal de grandes superficies y d’empreses de venta a distancia. El problema ye cómo parar un modelu económicu que, anque paeza lo contrario, nun perxudica a les ciudades sinón, una vuelta más, al mundiu rural. Y nun falo de pueblos de venti habitantes, que los que vivimos nellos yá sabemos los que mos toca, sinón de villes de tamañu mediu, llámense Villaviciosa, L’Infiestu, Nava, Panes o Noreña.
Pero, en fín, ya Merleau-Ponty, un estructuralista inxustamente escaecíu, decía que “tou organismu ye una melodía que canta pa sigomesma”.
