martes 13/4/21

Asturies, añu 2 (dp)

El 2021 dempués de Cristo (dc) ye l’añu 2 dempués de la pandemia (dp) y Asturies encáralu bastante mal, como reconoz el mesmu gobiernu. El presidente Barbón cansó por activa y por pasiva de dicir que les coses tiníen que facese d’otra forma pero que nun pudo ser porque nun tinía competencies pa ello. Un gobiernu que nun tien competencies ye, llóxicamente, un gobiernu ensín competencies, esto ye, un gobiernu incompetente y, polo tanto, dafechamente prescindible.

Esta comunidá sufriera les mesmes crisis qu’otres: la estanflacionista de los 70, la industrial de los 90, la financiera d’entamos del XXI y la recesión del 2008. Pero los sos efeutos foran más devastadores que notros llugares con estructures económiques asemeyaes, como, mui especialmente, el País Vascu

Diz, d’otra banda, la conseyera Cárcaba, de facienda, que la pandemia “abriera una ventana pa ver la falta de financiación de les comunidaes autónomes”, cosa que, siendo evidente dende hai décades, califica a la perfección a la responsable de les cuentes públiques, que se diera cuenta anteayeri del asuntu. Ye más, fala la conseyera de qu’eso pasa en toles comunidaes, non sólo n’Asturies, lo que ye, en curtio y drecho, falso. Non toles comunidaes tan igual, como Cárcaba mesmo diz, cuando descubre de repente que’l modelu de financiación nun responde a una estructura de costes reales porque nun tien en cuenta l’avieyamientu y la dispersión poblacional. Vamos, que dempués de dicir que ye un problema de toles comunidaes, recoñoz que ye un problema particularmente grave de les que tienen avieyamientu y dispersión, nómina encabezada por Asturies.

Esta comunidá sufriera les mesmes crisis qu’otres: la estanflacionista de los 70, la industrial de los 90, la financiera d’entamos del XXI y la recesión del 2008. Pero los sos efeutos foran más devastadores que notros llugares con estructures económiques asemeyaes, como, mui especialmente, el País Vascu. Dalguna diferencialidá habrá, ye de suponer. Nun había falta de tecnoloxía, con una industria de bienes d’equipu a la cabeza de les comunidaes autónomes; tampoco de falta de centros d’investigación ya innovación, con empreses punteres, una universidá de calidá suficiente, un parque tecnolóxicu de los meyores del reinu; tampoco por falta de cualificación llaboral, valor qu’Asturies siempre caltuvo bien altu dende los primeros años del sieclu XX.

Pero llega el 2 de la era covid y, por aquello dé, tóo pa práu. Nun ye una casualidá nin una cosa menor que la primer sacrificada ye la oficialidá de la llingua asturiana. Yá van plantegalo pal añu 3, el enantes 2022 de la era cristiana

La diferencialidá ye la cris política a la que mos llevó un modelu que ye un verdaderu réxime nel que los intereses partidistes, sindicales ya empresariales son los mesmos y l’interés pol país dengún. Por eso nun tien Asturies competencies p’alfrentase a nada, como agora descubre un presidente d’un partíu que lleva nel poder cuarenta años; como tampoco instrumentos económicofinancieros, cosa que tamién descubre agora una conseyera del mesmu partíu. Vamos pensar que nun son mui llistos porque, de nun ser asina, mester sedrá pensar en custiones que mos lleven a la ética, a la moral y a la dignidá.

El gobiernu asturianu, na so alocución del 8 de setiembre del 2020 de la era cristiana, cuando yéramos l’edén de la salú, la islla que resistía al coronavirus, falaba de qu’Asturies necesitaba un rellatu identitariu, un refuerzu de la ciudadanía ya’l compromisu de la sociedá civil. Paecía que taba acabando la llarga nueche de los gobiernos protectorales, colos sos alliaos formadores d’opinión y la casta dominante. Falar de “élite” n’Asturies ye una aberración conceptual.

Tamos representaos, nel gobiernu y na oposición, por xente tan mediocre que ye incapaz de facer una política cultural ensín desatender la económica y la sanitaria.

Pero llega el 2 de la era covid y, por aquello dé, tóo pa práu. Nun ye una casualidá nin una cosa menor que la primer sacrificada ye la oficialidá de la llingua asturiana. Yá van plantegalo pal añu 3, el enantes 2022 de la era cristiana. La verdá ye qu’esa decisión namás que dexará sosprendíos a los más inxenuos de la tribu, porque los indios vieyos nunca creyeron muncho na promesa. Adrián Barbón diz que nel añu 2, enantes 2021, “tolos esfuerzos deben centrase en controlar la salú pública y reactivar la economía”. El PP y Ciudadanos sofiten como un solu home porque, como diz Pablo González, la oficialidá ye un “problema artificial pa distraer a los ciudadanos de la xestión”.

Tamos representaos, nel gobiernu y na oposición, por xente tan mediocre que ye incapaz de facer una política cultural ensín desatender la económica y la sanitaria. Ye de suponer que nesti añu 2 nun habrá premios Princesa, pesllarán los centros d’acoyía pa inmigrantes, pa muyeres maltrataes o pa los escluyíos, apararán los programes d’internet rural, nun vaiga ser qu’eso nun dexe xestionar la pandemia a los nuesos grandes trabayadores de la Xunta Xeneral. Ye más: si hai debate sobro cómo facer el nuesu modelu d’oficialidá los mélicos del HUCA dexarán d’atender a los enfermos y les farmacies van dexar de vender supositorios.

Xovellanos dixo nel XVIII que yera mester “recuperar una Asturies asturiana”. Vázquez de Mella, de tradición ideolóxica bien distinta, dixo nel XIX que “el primer deber d’Asturies ye asturianizase”. Adrián Barbón, bien lloñe de los dos por munches y varies razones, diz nel 2 dp que “defender lo asturiano ye malo pa la salú”.

Asturies, añu 2 (dp)
Comentarios