Los últimos episodios de la variante ferroviaria y del enésimu retrasu del AVE tal paecen tar sacando a les fuerces vives asturianes del so “dolce far niente”, el so estáu habitual dende hai cuarenta años. Pero nun mos engañemos: nun ye namás que dalgo íntimamente vinculáu al añu nel qu’entramos, que ye, por sí dalguién lo escaeciera, un añu elleitoral. Sonara’l turullu de les urnes y hai que ponese arrechos, ofendíos y mui dolíos nel corazón políticu provincianu, esi enxendru que los palurdos llamen “asturianía”.
Los asturianos entramos nuna triba “síndrome d’Estocolmo”, esa patoloxía que fae identificase al secuestráu col so secuestrador, de forma qu’acaba por pensar que-y debe la mesma vida y qu’ensín él nun tendría posibilidá de sobrovivir
Lo que pasa ye lo que tinía que pasar, que nada hai que nun tea’l so aniciu, el so desendolcu y la so llóxica conclusión. Asturies vien careciendo dende siempres d’una política socioeconómica y cultural que podemos calificar de “narcotizante”, onde la custión yera dar perres y privilexos a los hipotéticamente más peleones, cosa que ye más que discutible, y, asina, acabar con toa posibilidá de protesta. Pero ye qu’una sociedá basada na subvención y la tresferencia acaba por ser una sociedá ensín iniciativa denguna, ensín creatividá, ensín sustancia.
Pero, pa enriba, los asturianos entramos nuna triba “síndrome d’Estocolmo”, esa patoloxía que fae identificase al secuestráu col so secuestrador, de forma qu’acaba por pensar que-y debe la mesma vida y qu’ensín él nun tendría posibilidá de sobrovivir. Dalguién escribía l’otru día nun periódicu qu’esi pueblu anestesiáu considérase privilexáu por comer mortadela subvencionao cuando nel restu d’España tan comiendo xamón.
Agora llega un nueu fiascu. Paez mentira: los nuesos políticos consideren que ye dalgo llamentable y sosprendente, y non dalgo normal, propio d’un país que nun pinta nada y que menos va pintar. Porque ye difícile qu’Asturies seya respetada cuando ye l’exemplu paradigmáticu de país que nun se respeta a sigomesmu y cuando ye un pueblu con un nivel de servilismu impensable hai poco más de cincuenta años, por nun falar de cien o doscientos, cuando fuera vanguardia del movimientu obreru y de la illustración lliberal enantes.
Ye mui difícile que te respeten si tu nun tienes autoestima. Si dexes morrer les tos tradiciones y la to memoria histórica, si acabes faciendo feries d’abril y nun respetes nin los topónimos de los pueblos, ¿qué quiés que piensen otros? Pues lo normal: que tienes un bon sitiu pa venir de vacaciones y que yes un bon servidor que trates de ser lo más educao posible y que, con un poco de tiempu, acabarás por decir “bwana”.
Ye curioso lleer y sentir como los nuesos políticos tan indignaos, especialmente dempués de lo del retrasu del AVE. L’autopista’l mar, les comunicaciones aéries internacionales o la decadencia de la universidá nun son custiones tan importantes, pero... ¿tar a más de tres hores de Madrid?... ¡eso sí que non! Glayen los que mos van pidir el votu dientro unos menses que nun se xuega colos asturianos, qu’Asturies merez respetu, que ye una burlla, que ye una broma mal gustu anunciar Asturies na terminal del AVE n’Atocha... Pero resulta qu’Asturies ye la única comunidá autónoma na qu’un presidente dixo públicamente que la so misión nun yera defender los sos intereses.
Y sentimos pedir respetu a políticos que, con trampes y falacies, condicionaron la oficialidá del asturiano a reformes nel IRPF o nel impuestu de sucesiones. Y, de sacar eso palantre, condicionaríenlo a los horarios de les policíes municipales o a la retirada de ñeros de gaviotes. Y vien esto al casu porque ún de los mayores fracasos fue la perda de l’Axencia d’Intelixencia Artificial de la Unión Europea. Xixón tinía toles papeletes pero quién ganara la partía fue Coruña. Y podemos ller nel informe xuistificativu que “l’Axencia diba ser un activu esencial pa materializar la convivencia de llingües oficiales nel territoriu”. Nesti sen, continúen desplicando, “Galicia podría actuar como rexón na que desplegar dalgunos de los proyeutos previstos nel proyeutu estratéxicu pa la recuperación y tresformación económica ‘Nueva Economía de la Llingua’ col que se prevé potenciar l’español y les llingües cooficiales como fautores de crecimientu y competitividád al traviés d’un ecosistema d’innovación ya intelixencia artificial”. Total, qu’el fechu de tener una llingua oficial, el gallego nesti casu, fuera determinante pa la decisión europea. Pero como Asturies ye de fala esclusivamente castellana y ayuntamientos, gobiernu, partíos, sindicatos, empresarios, consideren que l’asturiano nun esiste y que ye un inventu de cuatru aprovechaos...
Como bien desplicara Robert Lucas cola so teoría de les espeutatives racionales, que-y valiera’l Nobel d’economía yá en 1995, les persones y les empreses adauten la so conducta al escenariu futuru más probable. Por eso n’Asturies sólo queden vieyos con pensiones rellativamente altes y mozos ensín oficiu nin beneficiu, mientres marchen los formaos, educaos colos nuesos impuestos, y que, normalmente, trunfen nel esterior. Non en baldre los indicadores asturianos d’I+D+i son mui satisfaitorios en capital humanu, pero la inversión, tanto pública como privada, ye escosa, colo que nin retenemos nin atrayemos talentu.
