Esta selmana pasada pudimos asistir a unes xornaes en Villaviciosa col títulu de “Carlomagno y Asturies”. Acertadamente, vinculáranse les xornaes al proyeutu culural paneuropéu de la “Vía Carlomagno”, una iniciativa impulsada nel so día pol Conseyu d’Europa. A esti respeutu, el llabor del Conseyu Asturianu del Movimientu Européu diera frutos en forma d’iniciatives varies, siendo una de les principales la inclusión d’Asturies na ya consolidada dende hai años “Vía Carlomagno”, especialmente en Francia y Alemaña, pero tamién n’Italia, nes rexones centrales de lo que fuera nel so día’l Sacro Imperiu Romanu Xermánicu, el biltu de lo que güei ye la Unión Europa.
Lo que Roma fuera pa Carlomagno, coronándose nella na navidá del añu 800, Compostela fue p’Alfonso II una década dempués
Les rellaciones de Carlomagno con Alfonso II foran intenses, siendo’l rei asturianu un “par” del emperador francu, que yera talu en calidá de “primus inter pares”. La construcción de la Europa altomedieval, allá polos tiempos que van del sieglu VIII al sieglu XI, tuviera nel reinu d’Asturies la so avanzada meridional. Non namás la historia podemos centrala en Carlos y Alfonso sinón, mui especialmente, en los dos grandes conseyeros de la corona, verdaderos sabios de la dómina, Alcuino de York y Beato de Llébana, que manteníen rellación epistolar y, posiblemente, dalgún qu’otru alcuentru personal.
El proyeutu históricu y cultural de la “Vía Carlomagno” nun compite, sinón tolo contrario, col proyeutu paralelu del “Camín de Compostela”, tamién obra y creación d’Alfonso II y de Beato de Llébana
Aquellos reinos, a los que podíamos unir los d’Inglaterra y Navarra y señoríos del norte de la península itálica y, dalgo dempués, el más modernu reinu de Portugal, son la cuna de l’actual Europa, la que, siempres caltuvo unidá cultural y rellación económica, por más que con crueles episodios, llargos munches vegaes, que son, estrictamente falando, auténtiques “guerres civiles”.
El proyeutu históricu y cultural de la “Vía Carlomagno” nun compite, sinón tolo contrario, col proyeutu paralelu del “Camín de Compostela”, tamién obra y creación d’Alfonso II y de Beato de Llébana. El rei asturianu, dende Uviéu, como Carlomagno dende Aquisgrán, pretendíen consolidar, non sólo una entidá política, sinón tamién una “idega”, pa lo que de gran importancia y prestixu yera cuntar con un llugar sagráu, con una “ciudá santa”. Lo que Roma fuera pa Carlomagno, coronándose nella na navidá del añu 800, Compostela fue p’Alfonso II una década dempués. Aprovechando tradiciones anteriores, herétiques en bona midía, el mitu de la tumba del apóstole Santiago fixo d’Asturies un reinu providencial, una nación embaxo la “protección divina”.
Que les xornaes sobro les rellaciones de Carlomagno y Asturies se cellebraren en Villaviciosa nun ye una mera custión d’oportunismu políticu, por más que, en tiempu ellectoral, tóo ye aprovechable, sinón dalgo mui razonable. Les tierres de Maliayu, nel camín de Compostela y d’El Salvador d’Uviéu, cuenten con una ría que asiempres fue vía d’intercambiu cultural y económicu col norte d’Europa, con Inglaterra, Irlanda, Francia y Escandinavia, seguramente dende la edá’l bronce. Amás, lo qu’agora conocemos como valle de Valdediós, ye un centru de poder, un llugar teofánicu vinculáu a les augües, onde nunca dexó d’haber un santuariu, como l’actual tovía conserváu, el “conventín” que consagrara Alfonso III el Grande, “magno” como Carlos, anque podría ser anterior.
Pero estos proyeutos nun sólo son importantes dende un puntu vista cultural o históricu, mui necesarios pa valorar una historia como la d’Asturies, escaecía por munchos y minusvalorada por otros tantos, o subsidiaria d’una historia d’España decimonónica. Tamién tamos falando d’un enorme potencial económicu pa una comunidá que pierde pesu y población. Hai un turismu européu de calidá impresionante que se mueve con esti tipu de parámetros. Y col turismu y la difusión cultural vienen otros tipos d’intercambios de productos y servicios, convenios d’investigación, nueves y racionales infraestructures de comunicación y tresportes. Por exemplu, Xosé Alba, profesor de la Universidá d’Uviéu y ún de los personaxes más activos nesta iniciativa, contaba qu’un dirixente francés del proyeutu “Vía Carlomagno”, al visitar Asturies y conocer l’arte de la nuesa monarquía y del posterior románicu, dixo qu’equí, nun país tan pequeñu, había docenes d’edificios d’un tiempu del qu’en toa Francia nun alcontraríamos más de tres o cuatru.
