Opinión

La chispa d’un quad, el destrozu rural

Un home fuera absueltu del incendiu d’hai un tiempu nos montes del conceyu d’Ayande. La fiscalía argumentaba que provocara l’enorme desastre por una chispa del motor del so quad. El casu ye que, sigún declaró l’acusáu, aquella tarde taba de calor y decidió salir a dar una vuelta col so quad y, siguiendo caleyes d’una manera aleatoria acabó nel altu La Marta, onde se declaró un incendiu descomanáu. Si los xueces consideren que nun hai denguna rellación ente esi viaxe por escapar del calor y’l desastre ecolóxicu ayandés será verdá.

El paisanu que tien un mastín nel monte curiando’l ganáu o un par de gatos na casería pa que controlen los mures nun puede sometese a normes urbanites unes normes que criminalicen al campesín y que nun conocen los usos ganaderos

Pero ye qu’esti ye un casu más de cómo dalgunos, o munchos, o los poderes públicos, ven l’espaciu rural. Agora que tamos falando de cómo una llei de bientar animal, necesaria y propia d’una sociedá culta y evolucionada, nun mira bien pol mundiu rural, tamién debemos atender a otres coses.

El paisanu que tien un mastín nel monte curiando’l ganáu o un par de gatos na casería pa que controlen los mures nun puede sometese a normes urbanites, unes normes que criminalicen al campesín y que nun conocen los usos ganaderos. Tampoco los que viven nos pueblos pueden soportar lleis absurdes a les que se remiten imbéciles que pasen unos díes nellos, reclamando dende que les vaques nun caguen ata que nun suenen les motosierres, pasando porque los pitos nun canten o que nun haiga voladores y campanes el día la fiesta.

Tan los cuarteles de la benemérita y yá tamien los xulgaos enllenos de denuncies d’unos gatinos abandonaos porque anden al debalu per una aldea, un cabritu maltratáu porque tien na oreya l’espetu de sanidá, un xatu sufriendo porque ta lloviendo y sigue nel prau... Colo bien que se vive en Madrid, ¡mira que venir de vacaciones y que te toquen los bemoles unos garrulos! Pero eso, seguramente, ye otra custión.

Porembargu hai otru asuntu que nun sal tanto nos medios y que mos remite a la chispa’l quad como presuntu focu d’un incendiu. L’espaciu rural ye como una tierra de naide na que cualisquiera puede facer lo que-y pete. Los caminos y caleyes tan esfarrapaos de tantu quad, coches 4x4, motos y bicicletes de montaña. Los caminos rurales nun son pistes de deporte sinón víes pecuaries y humanes, ancestrales munches d’elles, y nun pueden tar al serviciu d’empreses y particulares.

Lo mesmo qu’un rifle nun se da a cualisquiera, que se requier un desamen psicolóxicu, una certificación sobro antecedentes penales y revisiones añales, debería facese con estos vehículos.

Nun ye posible dir per una autovía con un tractor o con un carru tiráu de vaques o caballos. Y paez una prohibición llóxica. Ye más, los tractores y les carrocetes lleven una matrícula especial y pa guialos piden unos requisitos particulares. ¿Por qué a cualisquiera col carné pa llevar un scooter o un utilitariu-y permiten andar con máquines potentísimes, altamente contaminantes y que deterioren el suelu ata lo indecible?

Igual qu’un tractor obliga al so propietariu a xustificar la so dedicación, matriculalu de forma distintiva, pasar revisiones específiques, debería facese pa otros vehículos. Un quad puede ser bon instrumentu pa un ganaderu que trea vaques lloñe de casa, como un 4x4 ye mui útile pa ciudadanos que viven en llugares con problemes d’accesu, por ñeve, por pendiente, polo que seya. Pero qu’un idiota metropolitanu se faiga dueñu de los espacios rurales y qu’una empresa viva de facer rutes machacando espacios naturales y campesinos ye cosa mui distinta.

Lo mesmo qu’un rifle nun se da a cualisquiera, que se requier un desamen psicolóxicu, una certificación sobro antecedentes penales y revisiones añales, debería facese con estos vehículos. ¿Vusté pa qué quier esi aparatu que consume la hostia, contamina un copón, deteriora la tierra y molesta a los vecinos? Y, evidentemente, por pura llóxica ambiental y social, mester ye que nun haiga empreses dedicaes a eses coses, o que monten circuitos que paguen elles y non los paisanos y paisanes de los pueblos y les parroquies.