martes. 28.06.2022

Clima, guerra y austeridá

Hai cincuenta años qu'el Clube de Roma encargara a un equipu del Massachusetts Institute of Technology (MIT) dirixíu por Meadows el primer informe de la historia sobro cómo'l crecimientu económicu tenía unos llímites que nun yeran los sociales o políticos analizaos ata entós, sinón los ambientales. Aquel estudiu, presentáu un añu dempués, significara un güelpe nel mesmu corazón de la teoría económica, non sólo de la ortodoxa capitalista seguida en mediu mundiu, sinón tamién de la marxista aplicada nel otru mediu. Andando'l tiempu diéramosmos cuenta de qu'ente les dos conceiciones había mui poques diferencies polo que tocaba a lo fundamental. Y diera la casualidá de que, en 1973, españó la gran crisis enerxética y de materies primes, que llevó a la economía mundial al mayor colapsu dende 1929.

Poco daprendimos daquella y cuando, venti años dempués, un nuevu informe del MIT al Clube de Roma amosó que les coses entá taben peor, los grandes poderes respondieron de la mesma manera: envede aplicar polítiques d'austeridá llevaron allantre una estratexa de mayor consumu, mayor depredación y mayor saquéu de los pueblos sometíos a un neocolonialismu.

Y agora, dempués de dos décades dende'l Procolu de Kioto, seguimos ensín daprender, el cambiu climáticu va paeciendo cada vuelta más inevitable y la supervivencia de la nuesa especie cada vuelta más complicada. La ONU acaba de decir qu'el puntu de non retornu va tar en 2025 y que, de nun facer cambios radicales, vamos camín de la estinción.

Tamos, dicen o decíen enantes d'esti zurriburri, nun períodu "de transición", enerxética, económica, política, social...., en definitiva, de "transición sistémica", nun "cambiu de paradigma", si queremos velo asina

Por si fuera poco, los europeos, grandes consumidores d'enerxía y de, en xeneral, recursos naturales, por más que con polítiques bastante meyores que les de los Estaos Uníos y, por supuesto, China, alfrentámosmos a les consecuencies derivaes d'una guerra nes nueses fronteres, por nun decir que nel nuesu mesmu territoriu. Pase lo que pase n'Ucraña y Rusia, o mañana en Moldavia o Poloña, la situación de debilidá por, precisamente, nun seguir les nueses mesmes directrices económico-ambientales, faese cada día más evidente.

Tamos, dicen o decíen enantes d'esti zurriburri, nun períodu "de transición", enerxética, económica, política, social...., en definitiva, de "transición sistémica", nun "cambiu de paradigma", si queremos velo asina. Pero un cambiu de paradigma requier de cambios mentales y comportamentales y tamién, ¡oh, pallabra maldita! de "sacrificiu". Y volvemos al MIT y al Clube de Roma, y a la so recomendación d'austeridá.

Decía l'anarquista Kropotkin, casualmente de la familia principesca más importante de Rusia y de la estirpe fundadora de la Rus de Kiev, que tamos mui formaos y mos interesamos por munches coses pero que "nun sabemos d'aú vien el pan que comemos".

Nun se trata de l'austeridá que mos impusieron na recesión económica del 2008, aquello del "austericidiu", que consistió en salvar les economíes pela vía de tresferir rentes de les clases trabayadores a los grandes propietarios del capital y a una "clase ociosa" compuesta por vagos y maleantes que nos debería llevar a lleer al clásicu institucionalista Veblen. Non. Trátase d'una austeridá que mos remite a dalgo tan vieyo y razonable como l'atemperancia, la cuarta virtú cardinal del cristianismu orixinal, que mos diz cuándo lo abondo ye abondo; y que descansa na primera, la prudencia, de la que los romanos dicíen que yera l'orixe de toa virtú: "prudentia dicitur genitix virtutum".

Y vaiga agora una nota de cercanía. Dalgunos, yá mayulones, recordarán a Borrell en televisión desplicando por qué yera mester pagar impuestos si queríamos una democracia y un estáu del bientar, con sanidá, educación, tresportes, pensiones... Y consiguió convencer bastante bien de dalgo tan poco prestoso como ye cotizar. Hai unes selmanes, col tresfonfu de la guerra d'Ucraña, volviera a plantegar dalgo asemeyao: que yera necesaria l'austeridá enerxética. Les crítiques polítiques y mofes nes redes contáronse por miles. Borrell ye un home polo xeneral antipáticu y que paez evidente que ser simpáticu nun figura nel so programa, pero tien razón. Puede que pa parar el cambiu climáticu, la crisis enerxética y la estanflación que paez asomar, necesitemos xente menos simpática que mos fale como a adultos que quieren la verdá y non como a rapacinos. Decía l'anarquista Kropotkin, casualmente de la familia principesca más importante de Rusia y de la estirpe fundadora de la Rus de Kiev, que tamos mui formaos y mos interesamos por munches coses pero que "nun sabemos d'aú vien el pan que comemos".

Clima, guerra y austeridá
Comentarios