Acabara’l Mundial de fúbol más raru y polémicu de la historia. Nin tansiquier el cellebráu n’Arxentina de la dictadura de Videla tuviera tantu revuelu, en parte porque yeren tiempos de “guerra fría” y en parte porque nun había eses redes sociales que tolo controlen, pa lo bono y pa lo malo. Fuera’l Mundial más de “la pasta”, con unes organizaciones internacionales entrampaes na más sucia corrupción. Tanto que, como colofón, descubriérase qu’había una mafia nel mesmu parllamentu européu, de momentu básicamente socialista, dedicada a ser punta llanza de los xeques wahabites de Catar.
Y la mercantilización total llevó a que fora’l Mundial menos seguíu de la historia reciente.
Y acabara como entamara, con un gran trunfu de la satrapía catarí. Queríen un Mundial, queríen una final PSG-PSG y que, a ser posible, lu ganare Arxentina, gobernada históricamente por personaxes convalidables, adictos a les perres, más bien d’estrema drecha y antixudíos, y periféricu, qu’eso tamién puntúa. Eso nun desdiz del xuegu arxentinu, que fora meyor en 90 de los 120 minutos que duró l’alcuentru.
¿De verdá qu’esti Mundial sirviera pa “blanquear” a los señores feudales de Catar? Teo les mios duldies. Nunca se falara tanto de la corrupción, la vesania, la represión y la intolerancia d’una monarquía teocrática. Poco se sabía d’esi país y de los sos gobernantes, sacantes de que yeran ricos y que teníen compráu a mediu mundiu. Pero nun había datos de les condiciones llaborales, esclavistes en bona parte, nin se conocíen detalles de la situación de la muyer, por más que xente como Xavi Hernández, entrenador del Barça, lleven emplegándose a fondu na so defensa. Escenes como la de los xugadores ingleses, rudiella en tierra, o como les de los xugadores iraníes, en silenciu cuando sonaba’l so propiu himnu, nun taben previstes.
¿Y si llega ganar Francia na prórroga, con un blancu na puerte y diez negros corriendo?
Y la mercantilización total llevó a que fora’l Mundial menos seguíu de la historia reciente. La xente, falo del reinu d’España, nuna seronda avanzada, camín del iviernu, viera los partíos de les ocho que daba Televisión Española y sólo los que nun trabayen vieran los de la tarde. Y los de pagu, que son de chigre, mui poco. Desconozo los balances finales, la rentabilidá’l negociu, pero paezme que fuera muncho menor que los campionatos anteriores.
Hai una entruga que me fice dende l’iniciu. ¿Cuála sería la selleición favorita de los racistes y fascistes d’Europa y d’Estaos Uníos? Debieron tenelo difícile. De tolos equipos namás que cincu yeren de “blanco nuclear”: Croacia, Poloña, Serbia, Arxentina y Uruguai. Mal llevaríen la cosa los del “brexit”, los neonazis alemanes y nórdicos, los trumpistes, los lepenistes ya inclusive los de Vox. ¿Y si llega ganar Francia na prórroga, con un blancu na puerte y diez negros corriendo? Ye que ser “francés” ye ser ciudadanu de la república, la nación del plebiscitu cuotidianu del que falaba Renan.
Coda o estrambote. Chueca, vestida de pebeta, teñida y coqueteando..., pero, ¡che, Messi, pibe, qué grande sos! Ún de los meyores xugadores de la historia, porque decir “el meyor” nun tién xacíu porque nun se pueden encomparar momentos y estilos diferentes, acaba la so carrera d’una manera brillante. Y nin bailla cuando marca y nin tansiquier cuando gana una Copa’l Mundiu, nin besa l’escudu, nis señala colos pulgares la espalda col so nome, nin fae estupideces varies. Deberíen los árbitros sacar tarxeta bermeya a tou fubolista que nun cellebre un gol cola austeridá d’un Quini. O la d’un Messi.
