El paripé llamentable que vien protagonizando l’alcalde d’Uviéu col asuntu de la Escuela Mines ye un claru exemplu de la política asturiana, la propia de un provincianismu rastiegu y miserable al que tampoco son ayenos otros poderes públicos. El bodevil, porque llamar a esto “polémica” o “discusión” ye un insultu a la intelixencia, tien munches aristes pero namás qu’una cara: la marxinalidá d’Asturies nel reinu borbónicu y la intrescendencia de la nuesa universidá, lo mesmo en casa que fuera. Nin Alfredo Canteli ye Emma Buj, los dos del PP, nin Uviéu ye Teruel. Canteli ta pa festexos y Buj pa facer política, Uviéu pa poner grandes banderes roxigualdes y Teruel pa condicionar presupuestos del estáu.
El direutor de la Escuela Mines, Francisco Javier Iglesias, posicionárase dende l’entamu col alcalde. ¿La razón?, “¿qui le sait?”. O igual sí. Dalgunos caciquinos universitarios nun apararon ata llevar a Uviéu el CIATA de Villaviciosa
Ye posible qu’Ignacio Villaverde, nel so intentu de contentar a toudiós, acabara por nun contentar a naide, y que emperrase nel so proyeutu mierense perxudicara’l debate y encabronara entá más a los sos contrarios. Pero eso nun ye razón pa qu’un alcalde pretenda facer creyer a los ciudadanos que ye una aición criminal la d’un reutor que cumple coles sos funciones académiques, cola independencia que-y da la so alta maxistratura, a la que ta obligáu, ensín responder nin xustificase delantre d’un munícipe inorante de tolo que cinca a la universidá. Tanto inora l’alcalde que nin tansiquier debe saber que les cadenes que arrodien l’edificiu históricu de la cai San Francisco representen la inviolabilidá del “aula mater”, la llende que dengún correxidor puede trespasar porque entra nun ámbitu sagráu, el de la universidá, el del conocimientu. Tampoco debe saber l’alcalde que, cuando Uviéu yera una aldeona la so universidá tenía diputaos en cortes. Y ye qu’Asturies nun se puede entender ensín la Universidá d’Uviéu nin esa institución ensín Asturies. Y Asturies ye dalgo más qu’Uviéu, y Canteli un alcalde ente 78.
Tamién ye verdá qu’el campus de Mieres fora una decisión ensín xacíu, ayena a cualisquier racionalidá académica y científica.
El direutor de la Escuela Mines, Francisco Javier Iglesias, posicionárase dende l’entamu col alcalde. ¿La razón?, “¿qui le sait?”. O igual sí. Dalgunos caciquinos universitarios nun apararon ata llevar a Uviéu el CIATA de Villaviciosa, un organismu perconsolidáu, y ensín dengún argumentu académicu sacantes que nun queríen facer media hora de viax y queríen dir tomar el vermú nel “oviedín del alma” tolos díes, y non colos pueblerinos maliayos. Canteli desplicaba que “esta selmana dixérame un home qu’el so fíu quería estudiar mines pero qu’a Mieres nun diría; ya yo como padre faería lo mesmo, mandaríalu a Madrid o que nun fixera nada, pero a Mieres non”. En fín, toa una declaración política. Ya eso que l’alcalde ye de Práu, del conceyu de Teberga. Pero a cosmopaletu nun hai quien lu gane.
Tamién ye verdá qu’el campus de Mieres fora una decisión ensín xacíu, ayena a cualisquier racionalidá académica y científica. Como había perres, tamién un edificiu vacíu, el SOMA pidía lo que fuera, los gobiernos dábenlo pa caltener esta Asturies que ye un réxime y non una democracia y los ciudadanos aplaudíen lo que mandara’l señoritu... Y consolidárase una universidá tirando a mediocre, envede cumplir el vieyu suañu de Xovellanos d’un gran centru humanísticu y un gran centru téunico, que, por razones ellementales, debíen ser Uviéu y Xixón, anguaño comunicaes en poco más d’un cuartu d’hora. Pero agora vuelve l’alcalde al ataque y reclama una “gran politéunica” n’El Cristo.
¿Y qué va pasar cola vieya escuela cuando el treslláu a Mieres seya completu? Pues nun lo sabemos. Pero’l reutor Villaverde diz que nun va ser “pastu de la especulación” y que los sos 15.000 metros cuadraos van tener siempres “usu universitariu”. ¡Ui, ui, ui... que naide nun propuso nada...!
Pela so parte, universidá y gobiernu falen de gran esfuerzu financieru pa sacar del pozu a la universidá asturiana: los mil miyones tresferíos que repite la prensa como lletanía y proclama’l reutoráu con gran exerciciu d’autosatisfaición. Pero vamos ver. Esti añu la universidá recibiera 153 miyones. Como’l plan ye a seis años, con namás caltener lo actual taríamos falando de 918 miyones. Con una inflación prevista del 10-12 por cientu, mil miyones nun suponen dengún cambiu con respeutu a lo que güei tenemos.
Y mentanto, ¿qué diz el claustru? Nada, nun diz nada. Nun conocemos, en tou esti debate, denguna razón científica nin académica. Tóo resulta ser una polémica política dientro d’esa hexemonía compartía que llamen Principáu d’Asturies, cola universidá como peón qu’aparenta ser dama. N’Uviéu cúmplese dafechamente con esa máxima de que nos cambios na universidá pasa lo mesmo que nos cambios nos cimenterios, onde los de dentro nin collaboren nin protesten.
