L’espeutáculu políticu que tenemos montáu, un verdaderu circu ambulante qu’anuncia prodixos, fenómenos y funambulistes, llega a la irresponsabilidá total cuando introduz la inseguridá xurídica, que ye anuncia del principiu’l fin de la democracia. Suel llevada apareyada la desconexón y la desconfianza, envede l’equilibriu, ente dalgunos o ente todos los poderes del estáu. La interpretación d’una llei nun puede depender de que seya una “chapuza” porque, en principiu, la so redaición ta fecha por espertos. Nun ye llóxico pensar qu’una reforma l’articuláu penal la redaute personalmente un ministru o, nesti casu, una ministra. La llamada “llei del sí ye sí”, un nome con tan poca fortuna que la mesma espresión ye en parte culpiable del zurriburri nel que tamos, nun la fixo Irene Montero nuna nueche que tenía tiempu ya imsonniu. Otra cosa ye que la ministra y’l gobiernu fueran tan torpes como oportunistes na xestión política dende la propuesta parllamentaria ata la reaición posterior a l’aplicación de la norma.
Ye conveniente interpretar bien les coses y saber desplicales. Yá pasaran por una situación como esta’l gobiernu de Rajoy y’l PSOE cuandu lu respaldó cola aplicación del artículu 155 en Cataluña
El drechu penal tien dos principios básicos nuna sociedá democrática, cosa que saben ata los poco espertos: protexer a la víctima y nun ser tan punitiva que se convierta nuna venganza con cara de xusticia. Y paez que la reforma en custión cumple colos dos principios. La llei protexe a la víctima muncho más que l’anterior y ye menos cruel pa col culpiable. El follón que ta montáu nun ye pola desproteición sinón pola rebaxa de pena. Y sabemos dende siempres que los dellitos nun caen nel so númberu pola dureza les penes. Asina, siempres hebo asesinatos pesie a que siempres hubo pena muerte y son más a día de güei nos Estaos Uníos que na Unión Europea. El problema ellí ye que, por exemplu, la llibertá pa llevar armes desprotexe a tóos anque la dureza de la pena puede llegar incluso a la execución del criminal.
Tamién hai otru principiu fundamental, el de “in dubio, pro reo”, clave d’una xusticia garantista qu’afirma que, delantre la duldia, siempres dictar en favor del acusáu. Ye una base de la democracia y ta mui lligada a la norma de que nun se puede aplicar retroactividá si la llei perxudica al culpiable, pero sí si lu beneficia. Y equí tuvo’l gran erru de la ministra y del gobiernu, na so falta de pedagoxía. Si dixeren nel so día que la nuea norma yera necesaria, que lo ye; protexía más a la víctima, que la protexe; que ta bien fecha, que lo ta; pero que yeren inevitables casos de rebaxa de pena en sentencies dictaes con anterioridá; si asina lo fixeren, la mayoría de los demócrates diben entendelo. Pero, cargaos de prepotencia y de falsa visión de la realidá, qu’eso ye la ideoloxía n’ocasiones, los gobernantes entraron nun chorcu fonderu.
Ye conveniente interpretar bien les coses y saber desplicales. Yá pasaran por una situación como esta’l gobiernu de Rajoy y’l PSOE cuandu lu respaldó cola aplicación del artículu 155 en Cataluña. Dixeron que toles democracies tiníen dalgún mecanismu asemeyáu y, concretamente, l’alemana, que ye federal. Eso nun ye esautamente verdá. L’artículu 155 ye una copia del vixente n’Alemaña: el Senáu puede retirar competencies a una comunidá como’l Bundesrat puede facelo a un “lander”. Pero nel Bundesrat tan representaos los estaos federaos y son esos estaos los que pueden suprimir competencies a ún d’ellos, lo que ye una fórmula federal. Mientres tanto, el Senáu español nun representa a les comunidaes, coles que nun son éstes les que, aplicando principios federales, actúen, sinón les mayoríes partidistes. A eso lleva la barbaridá de copiar d’una Alemaña federal pero vaciando la cámara del caráuter federal.
Y podemos llegar a más: a ver si suprimir el dellitu de sedición nun lleva a situaciones inesperaes polos patrocinadores. Si ente l’altercáu públicu y la rebelión nun queda nada intermedio, a ver si nun veremos a xueces interpretar cualisquier altercáu pequeñu como rebelión y sentenciar a penes desproporcionaes, o a militares alzaos penaos como si tuvieran una pelea nun partíu de fúbol.
Pal próximu día falamos de la malversación.
