Como cada seyes menses llegara la milonga del cambiu d’horariu. ¿Tien xacíu esto?, ¿cuálu?, ¿dalquién se recuerda de cómo entamó la cosa y por qué? L’asuntu viniera de finales de 1973, cuando la gran crisis petrolífera. Pasaron cincuenta años y la estructura económica ye mui diferente. Esi modelu industrial yá nun esiste dende hai más de dos décades. Naquellos setenta la ellectricidá xenerábase con petróleu y carbón, dalgo de saltos d’augua y un poco de centrales ñucleares. Güei tamos notru modelu y nun procesu aceleráu de descarbonización, con un incrementu estraordinariu de les fontes renovables. Nos años ochenta hebo una verdadera revolución teunolóxica nesi campu, entamando por una reducción de consumu enerxéticu por unidá fabricada o tresportada.
Lo razonable sedría volver al horariu solar y ensín cambios semestrales, porque lo razonable ye atender a la naturaleza y que na seronda y nel iviernu los díes seyan más curtios y na primavera y nel branu más llargos.
El cambiu horariu a estes altures del XXI nun respuende a nada, nin a la escasez, nin a la estanflación, esa suma d’inflación, desemplegu y estancamientu, nin a la competitividá, nin a razón denguna. Incluso podríamos ver aspeutos negativos, nel casu del horariu branu, porque parte del sector servicios, col allargamientu de les tardes, consume enerxía durante más hores, ellevando los costes y provocando contaminación primaria na xeneración elléctrica y secundaria nel consumu.
Lo razonable sedría volver al horariu solar y ensín cambios semestrales, porque lo razonable ye atender a la naturaleza y que na seronda y nel iviernu los díes seyan más curtios y na primavera y nel branu más llargos. Pero, si nun queremos llegar a tanto, lo propio, como indiquen tolos estudios ya informes, deberíamos quedar tol añu col horariu d’iviernu.
Una de les más prestixoses redes d’investigación, Save Standard Time, tien un estudiu amplísimu sobro los beneficios d’un horariu únicu y qu’esi, de nun ser el solar, seya’l d’iviernu. En primer llugar fala de la salú, tolo rellacionao colos biorritmos, los ciclos circadianos, la consonancia de les constantes vitales, les cardíaques y les del sueñu especialmente, col cosmos. Pero tamién incide l’estudiu nos beneficios socioeconómicos, falando de seguranza pública, defensa, productividá, enseñanza, salarios, mediu ambiente, llibertades civiles...
Hai unos años realizose una encuesta na Unión Europea sobro estes custiones. El 84 por cientu amosó una posición favorable a que se dexara de cambiar la hora cada semestre, y, del total de los que contestaron esto, el 98 por cientu optaba pol horariu d’iviernu.
Lo llóxico, y abasta con ver un mapamundi, sedría que tuviéramos l’horariu que tienen el Reinu Uníu, Portugal y les Canaries. Ye lo que normalmente se conoz como UTC+1, esto ye, una hora más de la solar del meridián de Greenwich. Pero ye que, a mayores, España va una hora más per delantre, lo que significa dos con respeutu al Sol. Ata los años trenta tiníamos la hora inglesa, pero Franco, con aquel caráuter tan servil que tenía pa con Hitler, adoutó l’husu horariu de Berlín. A la mesma hora, pongamos les once de la nueche en xunetu, en Varsovia lleven dos hores durmiendo y en Vigo tan viendo atapecer na ría.
Nun últimu términu, tampoco sedría una barbaridá que la península ibérica tuviera dos husos horarios: el británicu en Galicia, Asturies, Llión, Portugal, Estremaúra y l’Andalucía bética, y’l francoalemán nel restu. Pa nosotros, vaya, la hora de Portugal.
Hai unos años realizose una encuesta na Unión Europea sobro estes custiones. El 84 por cientu amosó una posición favorable a que se dexara de cambiar la hora cada semestre, y, del total de los que contestaron esto, el 98 por cientu optaba pol horariu d’iviernu. La propia Comisión Europea aprobó una directrice nesi sentíu nel 2018.
En cambio, paez ser, sigún el CIS, que la mayoría de los españoles, un 66 por cientu, prefier l’horariu braniegu, que namás que pue desplicase porque ta trunfando la idega “festivalera” del tiempu llibre. La xente asocia’l cambiu d’horariu al branu y a la primavera, al bon tiempu, a ver atapecer na playa, a tomar copes nuna terraza, lo que ye una visión mui vacacional. Ye una razón que se tresllada a la política, una política cada vuelta más populista, una política que lleva a interpretar que la llibertá ye tomar cerveces nuna plaza. Naide alcuentra otres razones. Porque si les hai, ¿pa qué poner horariu d’iviernu? Pues faenlo porque ye’l horariu racional y razonable.
Pa Save Standard Time, con datos d’Estaos Uníos, hai tres o cuatru seutores que presionen con muncha xixa a los gobiernos y que cuenten con gran potencial publicitariu: los propietarios de campos de golf, el turismu de baxa calidá, que ye’l más abondosu, y los fabricantes de dolces y de refrescos. N’esprexón de la propia asociación, son seutores que querríen que “nun atapeciere nunca”. Tamos falando de seutores mui potentes na economía actual, mui terciarizada. L’asuntu de la calidá del serviciu ye mui visible, dándose una rellación clara de “a calidá más baxa, mayor demanda d’hores de sol al final del día”. Eso vémoslo claramente n’Asturies: cada añu más turismu y cada añu menos gastu por turista. Un exemplu: la hora punta de la cena na hostelería de baxa calidá anda ente les 22,00 y las 22,45, mientres que la d’alta calidá anda ente les 20,45 y les 21,15. Y, d’otra banda, el cambiu d’horariu o dexar sólo el de branu refuerza la estacionalización.
Dexemos de xugar y de faer tochaes. Tóo indica que lo meyor ye nun cambiar horarios dos vegaes al añu y que, puestos a nun seguir el ritmu natural, caltengamos como únicu horariu el qu’agora llamamos d’iviernu. Por salú, por economía y por futuru.
