sábado. 01.10.2022

Lo mesmo qu’un tal Cifuentes

Un añu más, el gobiernu decidió cellebrar el Día d’Asturies con una misa en Cuadonga onde, un añu más, aguantó l chaparrón integrista de Jesús Sanz, que vien ser el titular del consuláu n’Uviéu d’un estáu teocráticu gobernáu por un emperador y una xerontocracia esclusivamente masculina. Estoicamente, el presidente d’un gobiernu democráticu tuvo que soportar la humillación, ensín gutiar, d’un príncipe medieval que se dedicó a criticar lleis aprobaes por un parllamentu tamién democráticu pero que, amás, nada tien que ver con Asturies.

De toles formes, lo de poner a cayer d’un burru a representantes de los ciudadanos, enpieza a ser vezu corriente ente nosotros. Polos mesmos díes del discursu antidemocráticu del obispu Sanz en Cuadonga, el presidente del Tribunal Supremu, Carlos Lesmes, emplazaba al rei Felipe VI con unes pallabres que tiníen tola traza d’amenaces. Desixía contundentemente que se desbloqueara el Conseyu Xeneral del Poder Xudicial, so pena de, testualmente, tener “que tomar decisiones que nin queremos nin mos gusten”. Criticara l’altu maxistráu a los partíos políticos, apelando al rei con unes pallabres clares: “esti emplazamientu urxente ye un deber, señor, pa colos xueces españoles”. D’un lláu facía una crítica dura al poder llexislativu y al poder executivu, crítiques que los xueces toleren mui mal cuando’l sentíu ye l’inversu, y d’otru “emplazaba” al rei a intervenir, esto ye, a trespasar los sos llímites constitucionales. Agora que tamos nos fastos fúnebres de “la reina de les reines”, cabe preguntase si dalguién osaría n’Inglaterra facer esi discursu delantre d’Isabel II.

Pero equí cabe tóo, los insultos al estáu por parte d’un representante d’una potencia estranxera y’l discursu con tastu golpista de quien preside’l más altu tribunal d’una democracia, precisamente aquel qu’interpreta la so constitución.

Volviendo al casu asturianu, dempués de tantos años, paez que va siendo hora de qu’el día nacional se cellebre, en Cuadonga podría seguir siendo, como llugar simbólicu por escelencia, pero non con una ceremonia relixosa qu’esclui, pola so mesma sencia, a bona parte de la ciudadanía. Ye normal qu’al día grande’l país seya convidáu l’obispu, como’l rabín, el cónsul de Francia, el presidente de l’Academia de la Llingua, el rector de la universidá, una senadora del PP por Asturies o el gran maestre masónicu. Tamién sedría normal que l’obispu los convidara a la misa solemne del Salvador na catedral. Y llóxico sedría qu’acudieran. Pero cellebrar el Día d’Asturies con una misa ye lo mesmo qu’esponer el santu sudariu na sede de Comisiones Obreras de Siero o cellebrar les reuniones de Podemos en la sinagoga.

En 1794 fixéranse obres na carretera ente Xixón y Contruces, la que güei conocemos, precisamente, como carretera l’Obispu, que pasaba y pasa por frente a la ilesia de la virxe de Contrueces, la carbayera na que se facíen les fiestes populares y la llamada casa de les novenes. El casu ye que, aprovechando la situación, l’obipu d’Uviéu, l’avilesín Llano Ponte, decidiera vallar tola finca. Nun contaba monseñor cola reaición d’un illustráu celosu de los drechos y llibertaes. Gaspar Melchor de Xovellanos nun calló: “¿con qué drechu?, ¿convertirá en propio un sitiu públicu, destináu a romeríes y feries?”. Y añadía: “¡qué llástima que los obispos nun tean amigos que-ys falen claro!”.

El conceyu de Xixón unvió a un conceyal, un tal Miguel de Cifuentes, a parllamentar col obispu y defender los drechos de los vecinos de Contrueces, amosando los argumentos de Xovellanos. Pero Cifuentes, envede cumplir col so deber, dexárase convencer fácilemente por Llano Ponte y traicionó a los suyos.

Lo mesmo qu’un tal Cifuentes
Comentarios