Los historiadores de la España contemporánia tan amosando la so gran preocupación pol descomanáu “revisionismu” al que ta sometía la época de la república, la guerra y’l franquismu. La so preocupación nun ye pol impautu qu’esi movimientu, que nun ye un fenómenu nuevu, pudiera tener na historiografía o nes universidaes, sinón pola gran presión mediática, cola que se busca influyir nuna sociedá que nunca fuera informada nin formada durante décades.
Nun ye mui apropiao eso de llamar “revisionistes” a los que son, cenciellamente, mentirosos, y que nun tienen el más mínimu rigor científicu. Por definición, un historiador revisa y revisa la historia y, si ye honrau. almite qu’un documentu que nun conocía pon en custión incluso dalgunes coses que defendiera un tiempu enantes. Los que llamamos “revisionistes” nun son otra cosa que propagandistes d’una causa o d’otra. Tamién los hubo dende la esquierda, particularmente dende’l PCE, pero agora tamos alfrentando otra custión.
Sigún estos facedores de cuentos, hai una llínia de continuidá dende la criminal república, l’anarquismu y la masonería col PSOE de güei y con una ETA que sigue viva.
De xuru que ye Pio Moa, un home ensín formación científica, el más prolíficu de los “historeadores”, toreros de la historia. Escribe: “Unos señores pedíen disgregar España; otros queríen una revolución; tóos queríen destruyir la cultura cristiana. Y eso fue polo que se lluchó na guerra. Unos a favor y otros pa torgalo y ganaron los que lo impidieron. Eso fue lo que permitiera qu’España volviera ser un país uníu y prósperu (...) Nun hebo nin ún demócrata nes cárceles de Franco (...) La democracia vien del franquismu y toles amenancies a ella vienen del antifranquismu (...) El PSOE y la ETA yeren y son partíos socialistes, radicalmente antifranquistes, partidarios de les lleis de memoria, de xéneru, etcétera”. Aparte de que llama l’atención qu’esto lo diga un dirixente del Grupo Revolucionario Antifascista Primero de Octubre (GRAPO), historiadores como Preston, Moradiellos, Casanova o Viñas ponen l’énfasis en que tol analís ye una repetición de los argumentos colos que se xustificó l’alzamientu de 1936, anque non nel primer momentu, y, dempués, la represión y el crimen institucionalizaos durante décades.
Tamién inciden en que minimicen los númberos de muertos durante la guerra y dempués porque, nes poques ocasiones que van a les fontes, sólo acuden a los conseyos de guerra, cuando la mayoría de les execuciones fueron estraxudiciales. D’otru lláu, como afirmen de partía, dao que dengún defensor de la república yera demócrata, la conclusión ye llóxica: dengún demócrata pasó peles cárceles de Franco.
Sigún estos facedores de cuentos, hai una llínia de continuidá dende la criminal república, l’anarquismu y la masonería col PSOE de güei y con una ETA que sigue viva. Y tamién siguen ehí los comunistes, que pretenden torgar que tomemos unes botelles de sidra nuna terracina a les doce la nueche. Tamién son francmasones los que protexen al llobu y dexen a Capiellina en manes de moros y negros que vienen a quitamos los puestos de trabayu. Tóo eso yá taba na idega d’aquellos malos homes del 14 d’abril.
Lo más sosprendente ye la gran capacidá intelleutual d’esta xente. Mientres que Preston tarda diez años n’escribir un llibru sobro la república, la guerra y’l franquismu, Moa escribe diez llibros nun añu. Sí hai un historiador con llarga trayeutoria que, incomprensiblemente, porque como científicu debería ser rigurosu, apuntose a esta barbaridá. Ye Stanley Payne, non un revisionista, non, sinon un reaccionariu que raya col fascismu.
Bono sería qu’estes historietes de Moa, Trapiello, Vidal, Platón, quedaran en novelines de ficción, que ye lo que son. Pero tan informando y formando a xente mozo. Escontra ello mester ye engrasar, non yá la memoria, sinón la investigación y la revisión, sí, la revisión, la revisión d’una historia falseada pol cuartel, el tronu y l’altar.
